„ძალა ერთობაშია! ძალა ევროპაშია!“ – დღეს, 9 მაისს, ბათუმში, ევროპის მოედანზე ევროპის დღისადმი მიძღვნილი აქცია გაიმართება. ორგანიზატორების განცხადებით ევროპის მოედანზე 17:00 საათზე შეიკრიბებიან.
საქართველომ ევროკავშირის კანდიდატი ქვეყნის სტატუსი 2023 წლის 14 დეკემბერს მიიღო.
ამის შემდეგ, საქართველომ ევროკომისიისგან მიიღო რეკომენდაციები, თუ რა ნაბიჯები უნდა გადაედგა საქართველოს გაწევრიანებისთვის.
მათ შორისაა ადამიანის ძირითადი უფლებების გაუმჯობესება ქვეყანაში, მედიის, სასამართლოს თავისუფლება და ასე შემდეგ.
თუმცა, „ოცნების“ ხელისუფლებამ ამ რეკომენდაციების შესრულების ნაცვლად, 2024 წლის 28 ნოემბერს გამოაცხადა, რომ ის არათუ აპირებდა ამ რეკომენდაციების შესრულებას, არამედ აჩერებდა ევროინტეგრაციის პროცესს, რასაც ქვეყანაში მასობრივი პროტესტი მოჰყვა.
დღეს უწყვეტი პროევროპული საპროტესტო აქციების 163-ე დღეა.
ათიათასობით ადამიანი ოთხი თვეა ქუჩაში დგას და მოითხოვს „ოცნების“ ხელისუფლების გადადგომას, ახალი არჩევნების ჩატარებას სამართლიან გარემოში, ასევე პოლიტპატიმრების გათავისუფლებას, რადგან საპროტესტო აქციები „ოცნების“ ხელისუფლებამ სასტიკად დაარბია, დაშავდა ოთხასამდე ადამიანი, მძიმე ტრავმებით ათობით ადამიანი მოხვდა საავადმყოფოში.
50-ზე მეტი მოქალაქე კი სისხლის სამართლის მუხლითაა დაკავებული. მათ შორისაა „ბათუმელებისა“ და „ნეტგაზეთის“ დამფუძნებელი მზია ამაღლობელი, რომელსაც პოლიციის უფროსზე სილის გარტყმის გამო, 4-იდან 7 წლამდე პატიმრობა ემუქრება.
8 მაისს, მზია ამაღლობელის მორიგი სასამართლო სხდომა იყო, სადაც მზია ამაღლობელმა საზოგადოებას მოუწოდა, იბრძოლონ ევროპული მომავლისთვის.
