21 აპრილს, გამთენიისას, რუსეთი უკრაინის რეგიონებს 96 დრონითა და სამი სხვადასხვა ტიპის რაკეტით დაესხა თავს – ინფორმაციას ამის შესახებ უკრაინის საჰაერო ძალები ავრცელებს.
აღდგომის წინა დღეს, რუსეთის პრეზიდენტმა ვლადიმერ პუტინმა განაცხადა 19 აპრილის 18:00 საათიდან 21 აპრილის 00:00 საათამდე „ყველა სამხედრო ოპერაციის შეჩერების“ შესახებ, იმ პირობით თუ მას უკრაინის მხარეც დაიცავდა. კიევში პუტინის განცხადებას სკეპტიციზმით შეხვდნენ, მაგრამ პრეზიდენტმა ვოლოდიმირ ზელენსკიმ თქვა, რომ უკრაინის არმია „სიჩუმეს“ „სარკისებურად“, ანუ სიჩუმით უპასუხებდა.
თუმცა, მხოლოდ 20 აპრილს, აღდგომის დღესასწაულზე, უკრაინაში დაფიქსირდა რუსების მიერ „ცეცხლის შეწყვეტის“ 2000-ზე მეტი დარღვევა – წერს უკრაინული მედია „ჰრომადსკე“.
გარდა ამისა, უკრაინული მედიის ცნობით, რომ რუსებმა ყირიმიდან ხერსონის მიმართულებით გაუშვეს ხომალდსაწინააღმდეგო საკრუიზო რაკეტა „ონიქსი“, ხოლო ნიკოლაევის რეგიონში შავი ზღვიდან ორი Kh-31P სარადარო რაკეტა. ასევე, რეგიონული სამხედრო ადმინისტრაციის ხელმძღვანელმა განაცხადა ნიკოლაევზე ღამით სარაკეტო დარტყმის შესახებ. მსხვერპლი და ნგრევა არ ყოფილა.
უკრაინის პროკურატურის ცნობით, ბოლო 24 საათის განმავლობაში უკრაინაში რუსული აგრესიის შედეგად 3 ადამიანი დაიღუპა და 3 დაშავდა.
