ევროპის ფონდმა საგამოძიებო ჟურნალისტიკის კონკურსის 2025 წლის გამარჯვებულები გამოავლინა და შვიდი მედია საშუალება დააჯილდოვა.
საგამოძიებო ჟურნალისტიკისა და მედიის მაკონტროლებელი ფუნქციის გამორჩეული ერთგულებით შესრულებისთვის დაჯილდოვდნენ გამოცემები:
- აი, ფაქტი
- ბათუმელები
- პუბლიკა
- სამხრეთის კარიბჭე
- საქართველოს ამბები (მთის ამბები)
- სტუდია მონიტორი
- ტელეკომპანია პირველის გამომძიებელ ჟურნალისტთა გუნდი
„ეს მედიასაშუალებები მნიშვნელოვან როლს ასრულებენ დემოკრატიის დაცვაში. ისინი აშუქებენ მნიშვნელოვან მოვლენებს, ამხელენ სისტემურ კორუფციას და საჯარო პირების ანგარიშვალდებულების უზრუნველსაყოფად, აქვეყნებენ მტკიცებულებებზე დამყარებულ ინფორმაციას.
ფონდმა ამ კონკურსით კიდევ ერთხელ გაუსვა ხაზი მედიის მრავალფეროვნებისა და საგამოძიებო ჟურნალისტიკის გაძლიერების მნიშვნელობას. დაჯილდოებული ორგანიზაციები მოიცავენ როგორც ეროვნულ, ისე რეგიონულ მედიას, მათ შორის ტელევიზიასა და ონლაინ პლატფორმებს. ფონდი აღიარებს ამ მედიასაშუალებების წვლილს საზოგადოებისთვის ობიექტური და კრიტიკული ინფორმაციის მიწოდებასა და მნიშვნელოვანი საკითხების გაშუქებაში. ჯილდო აღიარებს მათ მიღწევებს და ხელს უწყობს მათ მნიშვნელოვანი საგამოძიებო საქმიანობის გაგრძელებაში,“ – ნათქვამია ევროპის ფონდის განცხადებაში.
ევროპის ფონდი ავრცელებს ჟიურის წევრი პროფესორების კომენტარებსაც, თუ რა ნიშნით აირჩნენ მედია საშუალებები საგამოძიებო კონკურსში გამარჯვებულებად.
“ეს მედიასაშუალებები თვალსაჩინო მაგალითია იმისა, როგორ შეიძლება საგამოძიებო ჟურნალისტიკამ მოახდინოს რეალური გავლენა, მიუხედავად იმ გამოწვევებისა, რომლის წინაშეც დგანან ჟურნალისტები საქართველოში. გარემოსდაცვითი საკითხებიდან დაწყებული, საარჩევნო სისტემაში არსებული დარღვევების გამოძიებით დასრულებული, მათი მასალები უშიშრად ამხელენ უსამართლობას. მათი საქმიანობა შთააგონებს მთელ მსოფლიოში ჟურნალისტებს, რომლებსაც უწევთ მსგავს სირთულეებთან გამკლავება. ისინი ამტკიცებენ, რომ მიუხედავად ყველა წინააღმდეგობისა, სიმართლის დაუღალავი ძიება საბოლოოდ მოიტანს სასურველ შედეგს,” – ამბობს მარკ ჰორვიტი, ჟიურის წევრი, მისურის უნივერსიტეტის ჟურნალისტიკის სკოლის პროფესორი.
„ეს მედიასაშუალებები სრულად იმსახურებენ ამ ჯილდოებს, რადგან მათ გაბედულად და შეუპოვრად გამოამჟღავნეს სახელმწიფო უწყებებსა და საჯარო პირებში გავრცელებული კორუფციული პრაქტიკები. მიუხედავად ჟურნალისტებზე გახშირებული ფიზიკური თავდასხმებისა და მედიის შეზღუდვისკენ მიმართული კანონმდებლობის გამკაცრებისა, ისინი უშიშრად განაგრძობენ საქართველოს დემოკრატიის განადგურებისკენ მიმართული ქმედებების მხილებას, “ – ამბობს ბრანტ ჰიუსტონი, ჟიურის წევრი, გლობალური საგამოძიებო ჟურნალისტიკის ქსელის (GIJN) თანადამფუძნებელი, ილინოისის უნივერსიტეტის პროფესორი.
ევროპის ფონდი განაგრძობს საგამოძიებო ჟურნალისტიკის მხარდაჭერას საქართველოში, რათა ხელი შეუწყოს ანგარიშვალდებულ და გამჭვირვალე მმართველობას. ამ ინიციატივის ფარგლებში, ფონდმა გამოაცხადა კონკურსი, რომლის მიზანიც იყო იმ მედია ორგანიზაციების დაჯილდოება, რომლებიც დაუღალავად აშუქებენ მნიშვნელოვან მოვლენებს და ამხელენ სისტემური კორუფციისა და არაეფექტიანი მმართველობის მრავალ შემთხვევას.
