მზია ამაღლობელი წინასწარი პატიმრობიდან სასწრაფოდ უნდა გაათავისუფლონ – ადამიანის უფლებათა კომისარი

ევროსაბჭოს ადამიანის უფლებათა კომისარმა მაიკლ ო’ფლაჰერტიმ დღეს, 26 მარტს, გამოაქვეყნა მემორანდუმი საქართველოში ადამიანის უფლებების მდგომარეობის შესახებ.

ადამიანის უფლებათა კომისარი წერს, რომ საქართველოში ყოფნისას ციხეში მოინახულა ჟურნალისტი და მედიამენეჯერი მზია ამაღლობელი.

„მისი გახანგრძლივებული წინასწარი პატიმრობა გაუმართლებელია“, – აცხადებს მაიკლ ო’ფლაჰერტი.

რეკომენდაციებში ადამიანის უფლებათა კომისარი წერს, რომ საქართველოს ხელისუფლებამ სასწრაფოდ უნდა მიიღოს ზომები მზია ამაღლობელის წინასწარი პატიმრობიდან გასათავისუფლებლად და უზრუნველყოს მისი ყველა უფლება სამართალწარმოებასა და უდანაშაულობის პრეზუმფციაზე.

მემორანდუმს წინ უძღოდა კომისრის ვიზიტი საქართველოში 2025 წლის 21-23 იანვარს.

კომისარი აღნიშნავს, რომ მომიტინგეებისა და ჟურნალისტების მიმართ არასათანადო მოპყრობის სარწმუნო ცნობების მიუხედავად, არც ერთი სამართალდამცველი არ იქნა პასუხისგებაში მიცემული მაშინ, როდესაც პროტესტის მონაწილეების მიმართ სისხლისსამართლებრივი დევნა მიმდინარეობს.

კომისარი ხაზს უსვამს ნიღბიანი პოლიციელების სათანადო იდენტიფიკაციის გამოწვევას, როგორც ანგარიშვალდებულების დაბრკოლებას. მისი რეკომენდაციაა, ანგარიშვალდებულების გასაძლიერებლად ყველა სამართალდამცველმა ატაროს განმასხვავებელი მაიდენტიფიცირებელი ნიშანი. კომისარი ასევე მოუწოდებს ხელისუფლებას, გადადგას ყველა საჭირო ზომა მომიტინგეების მიმართ არასათანადო მოპყრობის შემთხვევების ეფექტური გამოძიების უზრუნველსაყოფად, მათ შორის სპეციალური საგამოძიებო სამსახურის დამოუკიდებლობისა და ეფექტურობის გაძლიერების გზით.

ევროპის საბჭოს ადამიანის უფლებათა კომისარი გამოთქვამს შეშფოთებას საქართველოს კანონებში შეკრების თავისუფლების მარეგულირებელი ბოლო ცვლილებების გამო, რომლებიც აწესებს არასათანადო შეზღუდვებს მომიტინგეებისთვის, აფართოებს სამართალდამცავი უწყებების უფლებამოსილებებს და აწესებს უფრო მკაცრ ჯარიმებს პროტესტთან დაკავშირებული ადმინისტრაციული სამართალდარღვევებისთვის.

„საკანონმდებლო ცვლილებებიდან უმეტესობა შეუთავსებელია კანონიერების, აუცილებლობისა და პროპორციულობის პრინციპებთან“, — აცხადებს კომისარი და რეკომენდაციას უწევს აღნიშნული კანონების ადამიანის უფლებათა საერთაშორისო სტანდარტებთან შესაბამისობაში მოყვანას.

კომისარი შეშფოთებულია ჟურნალისტების საქმიანობაში ჩარევის გამო, რაც გამოიხატა საპროტესტო აქციების დროს შევიწროებაში, ძალადობასა და დაშინებაში.

კომისარი ასევე გამოხატავს შეშფოთებას სამოქალაქო საზოგადოებისთვის სივრცის შემცირების გამო, მათ შორის არასამთავრობო ორგანიზაციებისა და უფლებადამცველების წინააღმდეგ გაჩაღებული რიტორიკისა და გადაწყვეტილების მიღების პროცესში სამოქალაქო საზოგადოების ორგანიზაციების ჩართულობის ნაკლებობის გამო. ევროსაბჭოს ადამიანის უფლებათა კომისარი უცხოური გავლენის გამჭვირვალობის კანონის გაუქმებისკენ მოუწოდებს.

კომისარი გამოთქვამს შეშფოთებას ლგბტი ადამიანების მიმართ ძალადობისა და დისკრიმინაციის დონეზე.

„ხელისუფლებამ უნდა შეწყვიტოს ლგბტი ადამიანების ყოველგვარი სტიგმატიზაცია და უზრუნველყოს შევიწროებისა და ძალადობის ყველა შემთხვევის ეფექტიანად გამოძიება. ხელისუფლებამ ასევე უნდა გააუქმოს კანონი ოჯახური ფასეულობებისა და არასრულწლოვანთა დაცვის შესახებ, რომელიც უზრუნველყოფს ლგბტი ადამიანების დისკრიმინაციის სამართლებრივ საფუძველს და განახორციელოს ადამიანის უფლებათა ევროპული სასამართლოს გადაწყვეტილებები ლგბტი ადამიანების უფლებებთან დაკავშირებით“, — აცხადებს კომისარი.