ბათუმის საკრებულომ დაამტკიცა განაშენიანების გეგმის კონცეფცია, რომელიც მრავალბინიანი კომპლექსის მშენებლობას ითვალისწინებს შერიფ ხიმშიაშვილის ქუჩაზე, #39/41/41ბ/43-ში.
განკარგულების პროექტის განმარტებითი ბარათის მიხედვით, აქ 150 მეტრი სიმაღლის, 33-სართულიან შენობას ააშენებენ. პროექტი შვიდ საკადასტრო ერთეულს მოიცავს, მათ შორის 6 შპს „გუმბათი დაუნთაუნმა“ უკვე გამოისყიდა. ერთი კი, ყველაზე დიდი ზომის ნაკვეთი, 4097 კვ.მეტრი, ჯერ ისევ ბათუმისა და ლაზეთის ეპარქიის საკუთრებაა.
ამ შენობაში მოხუცთა თავშესაფარი ფუნქციონირებს.
მონიშნულია სამშენებლო ტერიტორია. აქ აშენებული კორპუსიდან ზღვა გამოჩნდება, რაც ბინების სარფიანად გაყიდვას შეუწყობს ხელს.
საკრებულოსთვის წარდგენილ განკარგულების პროექტსა და განმარტებით ბარათში არაფერი წერია იმაზე, სად გადავლენ მოხუცები და კონკრეტულად რა შეთანხმება არსებობს შპს „გუმბათი დაუნთაუნსა“ და ეკლესიას შორის, რომლის პატრონაჟის ქვეშაა მოხუცთა თავშესაფარი.
საზოგადოებამ მხოლოდ ის იცის, რაც 2024 წლის ნოემბერში ბათუმისა და ლაზეთის ეპარქიამ გაავრცელა. მაშინ ეპარქია წერდა, „გუმბათი ჯგუფის“ დირექტორთან შედგა შეთანხმება, რომლის თანახმადაც კომპანია ეპარქიას ახალი თავშესაფრის აშენებას და მის აღჭურვას დაჰპირდა:
„საქართველოს საპატრიარქოს, ბათუმისა და ლაზეთის მიტროპოლიტ დიმიტრისა და შპს „გუმბათი ჯგუფის“ თანადამფუძნებელსა და დირექტორს – ლაშა ბალაძეს შორის გაფორმდა მემორანდუმი აშენდეს ახალი მოხუცებულთა თავშესაფარი 24-საათიანი მომსახურებით 150 მოხუცზე. მოხუცებულთა დღის ცენტრი 50 ბენეფიციარზე და საბავშვო ბაღი – 150 აღსაზრდელზე. შპს „გუმბათი ჯგუფი“ იღებს ვალდებულებას 20 თვის ვადაში საქართველოს საპატრიარქოს, ბათუმისა და ლაზეთის ეპარქიისთვის მულტიფუნქციური თანამედროვე არქიტექტურის მქონე შენობის აშენების თაობაზე, ასევე უზრუნველყოფს ავეჯით აღჭურვას. ეზოს კეთილმოწყობას და გამწვანებას“ – წერია ეპარქიის განცხადებაში.
პარალელურად გავრცელდა ახალი თავშესაფრის პროექტის პრეზენტაციის ფოტოები, სადაც ჩანს, რომ ღონისძიებას აჭარის მთავრობის ყოფილი თავმჯდომარე თორნიკე რიჟვაძე და ბათუმის მერი, არჩილ ჩიქოვანიც დაესწრნენ.
პროექტის პრეზენტაცია – ფოტო ეპარქიის ფეისბუქის გვერდიდან
შეთანხმების გაფორმება – ფოტო ეპარქიის ფეისბუქის გვერდიდან
ეპარქიის მიერ გავრცელებულ ინფორმაციაში ახალი თავშესაფრის მისამართი არ არის დასახელებული, თუმცა „ბათუმელების“ ინფორმაციით კომპანია თავშესაფრის მშენებლობას ადლიის დასახელებაში გეგმავს.
არც ბათუმის საკრებულოს სხდომაზე უთქვამთ და არც საპატრიარქოს მიერ გავრცელებულ ინფორმაციაშია საუბარი იმაზე, თუ სად გადაიყვანენ თავშესაფარში მცხოვრებთ, ვიდრე ახალი შენობის მშენებლობა დასრულდება. ასევე, თავშესაფრის გარდა, მიიღებს თუ არა ეპარქია რაიმე ფართობს ახალაშენებულ კორპუსში, ხიმშიაშვილის ქუჩაზე.
ბათუმის საკრებულომ 31 მარტის სხდომაზე დაამტკიცა შერიფ ხიმშიაშვილის ქუჩაზე მდებარე მიწის ნაკვეთების განაშენიანების კონცეფცია, შემდეგ ეტაპზე კომპანიამ განაშენიანების დეტალური გეგმა[გდგ] უნდა წარადგინოს. დამტკიცებული გდგ სამშენებლო ნებართვის გაცემის წინაპირობაა.
კომპანია „გუმბათის“ დირექტორის, ლაშა ბალაძის ინფორმაციით, კომპანია საპატრიარქოს ადლიაში 11 000 კვ.მეტრ გარემონტებულ შენობას გადასცემს ავეჯით და საჭირო ტექნიკით აღჭურვილს. მიწის ნაკვეთი კი, რომელზეც შენობას ააშენებენ, 5600 კვ. მეტრია.
სამშენებლო ნებართვები ჯერ არ მიუღიათ, თუმცა კომპანია ამ საკითხის მოგვარებაზე მუშაობს. კომპანიას ნებართვის მიღების შემდეგ მშენებლობისა და რემონტისთვის 30 თვე დასჭირდება.
ლაშა ბალაძემ გვითხრა ისიც, რომ პროექტს განიხილავს, როგორც საქველმოქმედოს და მისი საინვესტიციო ბიუჯეტი 10 მილიონი ლარია. მისი თქმით, თავშესაფრის ტერიტორიაზე მოაწყობენ გამწვანებულ ეზოს და საბავშვო ბაღს – მიმდებარედ.
ისევე, როგორც შერიფ ხიმშიაშვილის ქუჩაზე, ზღვასთან ახლოსაა ადლიის დასახლებაში მდებარე ნაკვეთიც, სადაც ახალი თავშესაფარი უნდა ააშენონ, თუმცა უნდა ითქვას ისიც, რომ აქ 150 მეტრი სიმაღლის შენობას ვერ აშენდება, რადგან ახლოს არის აეროპორტი, რაც ერთგვარი ხელშემშლელი ფაქტორია მშენებლებისთვის.
პროექტის განმარტებითი ბარათის მიხედვით კომპანიამ შერიფ ხიმშიაშვილის ქუჩაზე დაგეგმილი პროექტისთვის კ2 კოეფიციენტის გაზრდაც მოითხოვა, რაზეც თანხმობა მიიღო საკრებულოსგან.
შერიფ ხიმშიაშვილის ქუჩაზე სამშენებლო მიწის ნაკვეთების ერთი ნაწილი, კერძოდ 607 კვ.მეტრი მოქმედი თავშესაფრის მიმდებარედ „გუმბათი დაუნთაუნმა“ ბათუმის მერიის ელექტრონულ აუქციონზე 2025 წლის 19 მარტს ერთი ბიჯით, კონკურენციის გარეშე იყიდა, კომპანიამ ამ ნაკვეთში 1 მილიონ 82 000 ლარი გადაიხადა.
