დღეს, 12 მარტს, ბათუმის საქალაქო სასამართლოს მოსამართლეებმა: ალექსანდრე გოგუაძემ და ჯუმბერ ბეჟანიძემ 5 მოქალაქე დააჯარიმეს 5-5 ათასი ლარით, 31 იანვრის ღამეს ზებრა-გადასასვლელზე გადასვლის გამო.
„ეს ბორში – თქვენ. უხორცო ბორშია, 80 პროცენტი უხორცო ბორშს ჭამს,“- სასამართლო სხდომის დასაწყისში ასე დაიწყო საუბარი პროევროპული აქციის მონაწილემ, მალხაზ ირემაძემ მანამდე, ვიდრე ზებრაზე მოძრაობის გამო მასაც დააჯარიმებდა მოსამართლე ალექსანდრე გოგუაძე 5 ათასი ლარით.
ერთი და იგივე ტექსტი დღეს, 12 მარტს მოსამართლე ალექსანდრე გოგუაძემ ოთხჯერ ჩაიკითხა. მალხაზ ირემაძემდე ზებრაზე მოძრაობის გამო მოსამართლემ ასევე 5-5 ათასი ლარით დააჯარიმა: ანასტასია გოგოლიშვილი, მარი ცეცხლაძე, ნიკო მირცხულავა. ბორშით ნახევრად სავსე მინის ქილა მალხაზ ირემაძეს მანდატურებმა ჩამოართვეს.
„სახლში მიირთვით“- გაღიზიანება დაეტყო მოსამართლეს.
ამ საქმის განხილვაზე რამდენიმე დღის წინ მალხაზ ირემაძე პროცესზე ზებრის ფორმით მივიდა.
დღეს, 12 მარტს, ასევე „ზებრაზე მოძრაობის საქმეზე“ მოსამართლე ჯუმბერ ბეჟანიძემ 5 ათასი ლარით გუბაზ ლამპარაძე დააჯარიმა. გუშინ, 11 მარტს კი, მოსამართლე მარიანა ფომაევამ ერთმანეთის მიყოლებით გამოაცხადა ცარიელ დარბაზში 5-5 ათას ლარით დაჯარიმების შესახებ გადაწყვეტილებები პროევროპული აქციის 18 მონაწილის მიმართ.
ბათუმის საქალაქო სასამართლო – „ზებრაზე გადასვლის საქმე“. 12 მარტი, 2025 წელი
ბათუმის საქალაქო სასამართლო – „ზებრაზე გადასვლის საქმე“. 12 მარტი, 2025 წელი
საუბარია ბათუმში 31 იანვრის აქციაზე: პოლიციელებმა აქციის მონაწილეებს უთხრეს, რომ „საკმარისი რაოდენობით“ არ არიან და ქუჩის სავალი ნაწილო უნდა გაათავისუფლონ. აქციის მონაწილეებმა პროტესტის ნიშნად ზებრაზე მოძრაობა დაიწყეს, რაც, საიას შეფასებით, სრულად ჯდება გამოხატვის თავისუფლების ფარგლებში.
