დღეს, 28 იანვარს, ბათუმის საქალაქო სასამართლოს მოსამართლემ, ლევან ყოლბაიამ განიხილა „4 სტუდენტისა და დეკანის საქმე“ და 50-დღიანი პატიმრობის შემდეგ, სასამართლო დარბაზიდან, 5 000-ლარიანი გირაოს შეფარდების საფუძველზე გაათავისუფლა ხელოვნების უნივერსიტეტის დეკანი მამუკა ჯორბენაძე და სტუდენტები: დავით გვიანიძე, გიორგი დავითაძე და გურამ მიქელაძე.
სასამართლოს გადაწყვეტილებით, პატიმრობაში დარჩა მხოლოდ ერთი სტუდენტი, ანრი კაკაბაძე, არაერთი მუსიკალური კონკურსის გამარჯვებული პიანისტი, კონსერვატორიის სტუდენტი.
დეკანსა და სტუდენტებს პროკურატურა ჯგუფური ძალადობის ჩადენას ედავება. დღეს სასამართლოში ითქვა, რომ ანრი კაკაბაძე ამავე კატეგორიის დანაშაულისთვის გირაოთი აქამდე იყო გათავისუფლებული – სწორედ ამ არგუმენტით დატოვა მოსამართლე ლევან ყოლბაიამ სტუდენტი პატიმრობაში.
ბათუმის ხელოვნების უნივერსიტეტის სახვითი, სასცენო და კინო-ტელეხელოვნების ფაკულტეტის დეკანი, პროფესორი მამუკა ჯორბენაძე უნივერსიტეტის 4 სტუდენტი – დავით გვიანიძე, ანრი კაკაბაძე, გიორგი დავითაძე და გურამ მიქელაძე 2024 წლის 9 დეკემბერს დააკავეს. მათ პროკურატურა ჯგუფური ძალადობის ჩადენას ედავება.
აღკვეთი ღონისძიების შეცვლა დღეს გამართულ სასამართლო პროცესზე პროკურატურამ თავად მოითხოვა.
აღნიშნულ საქმეზე სასამართლო არსებით განხილვას 11 თებერვალს დაიწყებს.
- ნახეთ რეპორტაჟი სასამართლო პროცესიდან:
ბათუმში 3 სტუდენტსა და დეკანს პატიმრობა გირაოთი შეუცვალეს, 1 სტუდენტი პატიმრობაში რჩება
ამავე თემაზე:
