Batumelebi | “აჭარის ტელევიზიის” სახეები “ქართული ოცნების” საარჩევნო სიაში “აჭარის ტელევიზიის” სახეები “ქართული ოცნების” საარჩევნო სიაში – Batumelebi
RU | GE  

“აჭარის ტელევიზიის” სახეები “ქართული ოცნების” საარჩევნო სიაში

“ქართული ოცნების” პროპორციულ სიაში აჭარის უმაღლესი საბჭოს არჩევნებისთვის ცოტნე ანანიძეა – საზოგადოებრივი მაუწყებლის “აჭარის ტელევიზიის და რადიოს” დირექტორის მოადგილე, ასევე პოლიტიკური თოქ-შოუს წამყვანი. ინფორმაცია “ბათუმელებს” თავად ცოტნე ანანიძემ დაუდასტურა. მისი თქმით, არ იცის სიის რომელი ნომერი იქნება და დეტალებზე საღამოს 6 საათის შემდეგ ისაუბრებს.

“თანამშრომლების ნაწილს უკვე დავემშვიდობე. დღეს გავიგე, რომ “ქართული ოცნების” სიაში ვიქნებოდი, მეტს ახლა ვერაფერს გეტყვით,” – ამბობს ცოტნე ანანიძე.

“ქართული ოცნების” მაჟორიტარობის კანდიდატების წარდგენის დროს, 13 აგვისტოს, ცოტნე ანანიძემ “ბათუმელებს” უთხრა, რომ მას შეთავაზება თითქმის ყველა პოლიტიკური პარტიისგან ჰქონდა, მაგრამ უარი თქვა, ვინაიდან ის საკუთარ თავს ტელევიზიაში ხედავდა.

რამდენიმე დღის წინ ცოტნე ანანიძე, როგორც ჟურნალისტი, მონაწილეობდა “რუსთავი 2”-ის გადაცემა “არჩევანში”, სადაც მან თავის პოლიტიკურ ოპონენტებს დაუსვა კითხვები. ის ასევე მონაწილეობდა “აჭარის ტელევიზიის” სახელით ტელეკომპანია “GDS”-ის გადაცემაში – “შეხვედრები რეგიონულ მედიასთან”. ამ გადაცემის მთავარი სტუმარი ბიძინა ივანიშვილია.

“ქართული ოცნების” პარტიულ სიაში “აჭარის ტელევიზიის” კიდევ ერთი თანამშრომელია – ნინო ჩხეტია. მას პოლიტიკური თოქ-შოუ მიყავდა აჭარის რადიოში.

პარტიული სიების წარდგენა აჭარის უმაღლეს საარჩევნო კომისიაში საღამოს 6 საათზე სრულდება.

ნეტგაზეთის მასალების სხვა გამოცემებში გადაბეჭდვის წესი
ავტორი