„ქართულ ოცნებაში“ ფიზიკური დაპირისპირების შესახებ გუშინ, 10 დეკემბერს, მედიაში გავრცელებულ ინფორმაციას პარტიის პრესსამსახური დეზინფორმაციას უწოდებს და განმარტავს, რომ ყოფილმა პრემიერმა მხარი ვარჯიშის დროს დაიზიანა.
„გუშინდელი საღამოდან რადიკალური ოპოზიციის მიერ კონტროლირებადი ეგრეთ წოდებული მედიასაშუალებები და დაინტერესებული სუბიექტები ავრცელებენ დეზინფორმაციას, თითქოს ირაკლი ღარიბაშვილი ამერიკულ ჰოსპიტალში მრავლობითი დაზიანებებით მიიყვანეს. ვრცელდება ცნობები პარტიაში ფიზიკურ დაპირისპირებაზე. ეს არის მორიგი დეზინფორმაცია და საზოგადოების შეცდომაში შეყვანის უსუსური მცდელობა.
სინამდვილეში, „ქართული ოცნების“ თავმჯდომარემ ვარჯიშის დროს დაიზიანა მხარი და დასჭირდა მცირე სამედიცინო დახმარება. ირაკლი ღარიბაშვილი აგრძელებს მუშაობას. მოვუწოდებთ საზოგადოებას, არ მიაქციონ ყურადღება გავრცელებულ ტყუილებს“.
ამ ინფორმაციას „რუსთავი 2“ ქართული ოცნების პრესსამსახურზე დაყრდნობით ავრცელებს.
ბიძინა ივანიშვილთან წარსულში დაახლოებული პირი და თანაინვესტირების ფონდის ყოფილი ხელმძღვანელი, გიორგი ბაჩიაშვილი კი აცხადებს, რომ „ქართულ ოცნებაში“ ძალიან ბევრი ბზარია. მისი შეფასებით, ამის მიზეზი ისაა, რომ ევროინტეგრაციის საკითხში ივანიშვილმა „თავისი გუნდის ბევრი წევრი გადააგდო“.
„ქართულ ოცნებაში ძალიან ბევრი ბზარია. ირაკლი ღარიბაშვილი ორ კვირაზე მეტია არ გამოჩენილა ოფისში. დღეს ხმა გამოვიდა, რომ ტრავმატოლოგიურში იყო სხვადასხვა დაზიანებით. არ ვიცი, რას უკავშირდება, მაგრამ საიდუმლოებით მოცული ამბავია. თეა წულუკიანი არ ჩანს და დანამდვილებით ვიცი, რომ ნაწყენია, გაბრაზებული.
ივანიშვილმა არა მარტო ამომრჩეველი, ბევრი გუნდის წევრიც გადააგდო. ბევრს სჯეროდა, რომ ევროპაში მიდიოდნენ ღირსებით. ივანიშვილმა ისინიც გადააგდო და მოინდომა, თანამზრახველებად აქციოს. ბევრი ამაზე ხელს არ მოაწერს. მე მგონი, ღარიბაშვილიც არ აწერს. მე მგონი, იმიტომ დატოვა პრემიერის პოსტი, რომ მეორედ არ უნდოდა რუსული კანონის შემობრუნება. რაც ვიცი ფიზიკურ დაპირისპირებებზე, ხდება სპეცრაზმსა და შსს-ში. მეტი ინფორმაცია არ მაქვს“, – უთხრა მან „ტვ პირველს“.
- ვინ არის გიორგი ბაჩიაშვილი
როგორც „ნეტგაზეთი“ წერდა, 2023 წელს საქართველოს თანაინვესტირების ფონდის ყოფილ ხელმძღვანელს და ბიძინა ივანიშვილთან დაახლოებულ პირს – გიორგი ბაჩიაშვილს პროკურატურამ ბრალი წარუდგინა დიდი ოდენობით თანხის მითვისების ბრალდებით.
საქმე ეხება დიდი ოდენობით, კერძოდ, 8 253.13 ბიტკოინის მართლსაწინააღმდეგო მითვისებას და უკანონო შემოსავლის ლეგალიზაციას. აღნიშნული ბიტკოინის ღირებულება, პროკურატურის ცნობით, მითვისების მომენტში 39 215 820 აშშ დოლარს შეადგენდა. პროკურატურის თანახმად, ბაჩიაშვილმა ბიტკოინი ინვესტორისგან, კერძოდ კი ბიძინა ივანიშვილისგან მიითვისა. სასამართლომ ბაჩიაშვილს 2,5 მლნ. ლარის გირაო შეუფარდა. იგი ბრალს არ აღიარებს.
