სპეციალური საგამოძიებო სამსახურის ინფორმაციით, ნოემბერ-დეკემბრის საპროტესტო აქციებზე უწყებას 319 პირის უფლებების დარღვევის შესახებ მიმართეს. საგამოძიებო სამსახური იძიებს პოლიციელების მხრიდან ჩადენილ დანაშაულს, ასევე ჟურნალისტებზე თავდასხმის შემთხვევებს.
„სამსახურმა ცხელი ხაზის მეშვეობით, ასევე სახალხო დამცველის აპარატიდან, მედიაომბუდსმენიდან და დროებითი მოთავსების იზოლატორებიდან 319 პირის უფლებების დარღვევის თაობაზე მიიღო შეტყობინება, რომელთა შორისაც არიან როგორც აქციის მონაწილეები, ასევე მედიის წარმომადგენლები. სამსახური მუდმივ რეჟიმში განაგრძობს შეტყობინებების მიღებას. თითოეულ შეტყობინებაზე, სამსახურის არსებული რესურსის მაქსიმალური გამოყენებით ხდება სწრაფი სამართლებრივი რეაგირება,“ – აღნიშნულია სპეციალური საგამოძიებო სამსახურის მიერ დღეს, 5 დეკემბერს, გავრცელებულ ინფორმაციაში.
ამ უწყების ცნობით, საგამოძიებო ორგანოში, დროებითი მოთავსების იზოლატორებსა და სამედიცინო კლინიკებში გამოკითხულია 140 პირი, მათ შორის 5 ჟურნალისტი, 42 მოქალაქეს კი ჩაუტარდა სამედიცინო ექსპერტიზა.
სპეციალური საგამოძიებო სამსახურის ინფორმაციით, გამოძიება გრძელდება საპროტესტო აქციის მონაწილეთა მიმართ განხორციელებული სამსახურებრივი უფლებამოსილების ძალადობით გადამეტებისა და ჟურნალისტების პროფესიულ საქმიანობაში უკანონო ხელშეშლის ფაქტებზე.
პოლიციელებმა საპროტესტო აქციებზე 300-ზე მეტი ადამიანი დააკავეს.
- რა ხდება
საქართველოში მერვე დღეა საპროტესტო აქციები იმართება.
28 ნოემბერს ირაკლი კობახიძემ განაცხადა შემდეგი – „მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკებების გახსნის საკითხი“.
კობახიძის ამ განცხადებას ხალხის ქუჩაში გამოსვლა და უწყვეტი საპროტესტო აქციები მოჰყვა საქართველოს ქალაქებში.
2 დეკემბრიდან გაფიცვა დაიწყეს სკოლებმა და უნივერსიტეტებმა.
საქართველოს მოქალაქეები ითხოვენ დაინიშნოს ხელახალი არჩევნები და გადადგეს მთავრობა.
