23 ნოემბერს, ღამით, ბათუმში მოქალაქეებმა საპროტესტო ბანერი გადმოფინეს და ასე გააპროტესტეს “ქართული ოცნების” პოლიციური რეჟიმი.
“ყველგან პოლიცია, არსად სამართალი“ – წერია ბათუმში, იუსტიციის სახლის მიმდებარედ გადმოფენილ ბანერზე.
გუშინ, თბილისის საქალაქო სასამართლოში 400-ლარიანი ჯებირის დაზიანებაზე დაკავებული ახალგაზრდების, ომარ ოკრიბელაშვილის და საბა მეფარიშვილის პროცესზე, მოსამართლე ნათია გუდავამ, ახალგაზრდების პატიმრობა კვლავ ძალაში დატოვა. ისინი 12 მაისს, პარლამენტის წინ მიმდინარე საპროტესტო აქციების დროს დააკავეს. მათ 3-დან 6 წლამდე თავისუფლების აღკვეთა ემუქრებათ.
გუშინ, 22 ნოემბერს, აღკვეთის ღონისძიების სახით პატიმრობა შეუფარდეს, 19 ნოემბრის საპროტესტო აქციაზე დაკავებულ, 21 წლის მათე დევიძეს, რომელსაც რამდენიმე პოლიციელის ფიზიკურად დაზიანება ედება ბრალად. მას 4-დან 7 წლამდე პატიმრობა ემუქრება.
