ბათუმს ქართველი “ურბან სკეჩერები” ესტუმრნენ – ხელოვანთა ჯგუფი, რომელბიც ქალაქური ჩანახატების სესიებს გამართავენ ქალაქის სხვადასხვა ნაწილში.
„ურბან სკეჩერები“ ბათუმში / თამთა კახაბერიძის ფოტო
პირველი სესია 26 აგვისტოს, ხუთ საათზე, ევროპის მოედანზე გაიმართა. ამბობენ, რომ ორი დღის განმავლობაში დახატავენ ძველ და ახალ ბათუმის. აინტერესებთ ქალაქის არატურისტული ნაწილიც, რათა უკეთ გამოჩნდეს განსხვავება ქალაქის უბნებს შორის.
„რამდენიმე ლოკაცია წინასწარ, ბათუმელების რჩევით შევარჩიეთ. მაგალითად, ბაზარი, “რვაფეხა”, ძველი და ახალი ბულვარი, პორტის მიმდებარე ტერიტორია. თუმცა, ძირითადად, პროცესი თავისუფალია და მხატვრები დახატავენ იმას, რაც დააინტერესებთ ამ ქალაქში“ – ამბობს პროექტის ერთ-ერთი ორგანიზატორი ლალი პერტენავა.
„ურბან სკეჩერები“ ბათუმში / თამთა კახაბერიძის ფოტო
27 აგვისტოს, 7 საათზე, “ბათუმური ჩანახატების” გამოფენა ანბანის კოშკთან გაიმართება. პროცესი აბსოლუტურად ღიაა და როგორც დასწრება, ასევე მონაწილეობის მიღება ნებისმიერ დაინტერესებულ პირს შეუძლია.
პროექტის ორგანიზატორი, “აღმოსავლეთ პარტნიორობის ხელოვნებისა და კულტურის საბჭოს” წარმომადგენელი ილია მახარაძე გვიყვება, რომ იდეა გაჩნდა გერმანელ კოლეგებთან ურთიერთობით, რომლებიც შარშან იყვნენ საქართველოში ჩამოსულები: „ჩვენი მოწვევით წელს ისევ ჩამოვიდნენ, შტუტგარდელი “ურბან სკეჩერები”. გარდა მხატვრობისა, ისინი არიან სამოქალაქო აქტივისტებიც, რომლებიც თავიანთ ქალაქებში არსებული პრობლემების მოსაგვარებლად იბრძვიან.”
„ურბან სკეჩერები“ ბათუმში / თამთა კახაბერიძის ფოტო
ბათუმამდე იყვნენ ბოლნისში, დუშეთში, თბილისში და სხვა ქალაქებში. ლალი პერტენავა ამბობს რომ ქალაქების შერჩევისას აქცენტს აკეთებენ პრობლემატურ სივრცეებზე, სადაც რაიმე მნიშვნელოვანი საკითხია განსახილველი. კითხვაზე, რა ნიშნით შეარჩიეს ბათუმი, ასე გვპასუხობს: “ბათუმი ძალიან მნიშვნელოვანი ქალაქია ურბანული განვითარების თვალსაზრისით. ჩასახატი ქალაქია ბათუმი. ძალიან საინტერესო პროცესები მიმდინარეობს. ხშირი დებატების და დისკუსიების საგანია აქაური ურბანული ცვლილებები. მხატვრული თვალსაზრისით ძალიან საინტერესოა ამ ცვლილებების ასახვა.”
„ურბან სკეჩერები“ ბათუმში / თამთა კახაბერიძის ფოტო
მხატვართა ჯგუფი ქალაქს შაბათს, 27 აგვისტოს დატოვებს და ახალი სივრცეების ასათვისებლად გაემართება.
