„დინამო ბათუმს“ გიორგი ჭიაბრიშვილი გაწვრთნის. კლუბმა ახალი მთავარი მწვრთნელი გულშემატკივრებსა და მედიას დღეს, 18 ოქტომბერს წარუდგინა.
ჭიაბრიშვილს აქამდეც არაერთ ქართულ კლუბში უმუშავია და ეროვნულ დონეზე ერთ-ერთი გამორჩეულია თავისი მიღწევებით. ის სამჯერ გახდა საქართველოს ჩემპიონი სამ სხვადასხვა კლუბთან ერთად: 2012 წელს ზესტაფონის „ზესტაფონი“ გახადა ჩემპიონი, 2018 წელს თბილისის „იბერია“ (მაშინდელი საბურთალო), ხოლო 2022 წელს თბილისის დინამო. 2019 წელს ასევე „იბერიასთან“ ერთად გახდა საქართველოს დავით ყიფიანის თასის გამარჯვებული
გიორგი ჭიაბრიშვილი ორჯერ დასახელდა საქართველოს ეროვნული ლიგის წლის მწვრთნელად: 2018 და 2020 წლებში.
„დინამო ბათუმს“ ჭიაბრიშვილამდე უკრაინელი ოლეგ დემჩენკო წვრთნიდა, რომლის ხელმძღვანელობითაც „დინამომ“ ეროვნულ ლიგაში, გასულ სეზონზე, ჩემპიონობა იზეიმა. თუმცა, მიმდინარე სეზონში არადამაკმაყოფილებელი სპორტული შედეგების გამო დაითხოვეს.
მიმდინარე სეზონში, 28 ტურის შემდეგ, „დინამო ბათუმი“ მეოთხე ადგილზეა 42 ქულით და მე-3 ადგილზე მყოფ „იბერიას“ ჩამორჩება 13 ქულით. ასევე, უკვე გამოეთიშა საქართველოს დავით ყიფიანის თასის გათამაშებას.
ეს სტატისტიკა ცხადყოფს, რომ „დინამო ბათუმი“ აბსოლუტურად წარუმატებელ სეზონს ატარებს და მხოლოდ მათემატიკური, თეორიული შანსი არსებობს იმისა, რომ კლუბმა ეროვნულ ჩემპიონატში მე-3 ადგილი და, შესაბამისად, ევროტურნირების შესარჩევში მონაწილეობის უფლება მოიპოვოს.
