„ქართული ოცნების“ მიერ დისკრიმინაციული და რეპრესიული კანონების მიღების შედეგად, ევროკავშირთან ვიზალიბერალიზაციის საკითხის შესაძლო გადახედვის ფონზე, რუსეთი საქართველოს მოქალაქეების კონკრეტული ჯგუფებისთვის უვიზო რეჟიმს აფართოებს.
დღეს, 10 ოქტომბერს, რუსეთის პრეზიდენტმა ვლადიმერ პუტინმა გამოსცა განკარგულება საქართველოს მოქალაქეებისთვის უვიზო რეჟიმის გაფართოების შესახებ, რითაც გაამარტივა საქართველოს მოქალაქეებისთვის რუსეთში შესვლისა და გასვლის პროცედურა. ცვლილებები შევიდა 2023 წლის 10 მაისს გამოქვეყნებულ განკარგულებაში, როდესაც რუსეთმა საქართველოს მოქალაქეებისთვის ვიზები გააუქმა.
განკარგულების თანახმად, რუსეთის ფედერაციაში შესვლაზე უვიზო რეჟიმი ამიერიდან ვრცელდება საქართველოს მოქალაქეებზე, რომლებიც ჩადიან „რუსეთის ფედერაციაში შრომითი საქმიანობის განსახორციელებლად ან იმყოფებიან რუსეთის ფედერაციაში დროებით, 90 დღეზე მეტი ხნის ვადით, მათ შორის განათლების მიღების მიზნით“.
რუსეთის პროპაგანდისტული მედია ინტერფაქსი განმარტავს, რომ აქამდე, კონკრეტულად ამ კატეგორიის [შრომითი მიგრანტები და სტუდენტები] საქართველოს მოქალაქეებს არ ჰქონდათ ვიზის გარეშე რუსეთში შესვლის ან რუსეთი დატოვების უფლება.
დადგენილება ძალაში შევიდა გამოქვეყნებისთანავე.
„ამიერიდან მოქალაქეთა მითითებულ კატეგორიებს შეუძლიათ ეწვიონ რუსეთს „მათი პირადობის დამადასტურებელი მოქმედი დოკუმენტების საფუძველზე (საქართველოს მოქალაქის პასპორტი, დიპლომატიური პასპორტი, სამსახურებრივი პასპორტი, მეზღვაურის წიგნაკი, სამგზავრო დოკუმენტი საქართველოში დაბრუნებისთვის)“, – წერს ინტერფაქსი.
რუსეთის მოქალაქეებს საქართველოში გაჩერება შეუძლიათ გადაბმით -365 დღის განმავლობაში.
