დღეს, 20 აგვისტოს „თეთრი ხმაურის მოძრაობა“ სამტრედიაში, პოლიციის შენობის წინ, საპროტესტო აქციას მართავს. აქციის მონაწილეები 22 წლის დემურ სტურუაზე პოლიციელის მხრიდან შესაძლო ფსიქოლოგიურ ზეწოლას აპროტესტებენ, რაც დემურ სტურუას თვითმკვლელობის მიზეზი გახდა და დამნაშავის დასჯას ითხოვენ.
„თეთრი ხმაურის მოძრაობა“ პოლიციური ძალადობის წინააღმდეგ. ფოტო: ირმა დიმიტრაძე
დემურ სტურუას თვითმკვლელობის წინ დაწერილი წერილი დღეს აქციის მონაწილეებმა პოლიციელების მანქანებზე დააწებეს, რაც პოლიციელებმა მალევე მოხსნეს.
აქციის მონაწილეები მოითხოვენ პასუხისმგებლობაში მიეცეს პოლიციელი, რომელსაც დემურ სტურუა ასახელებს წერილში და მისი მეწყვილე, რომლის ვინაობასაც პოლიცია ამ დრომდე ასაიდუმლოებს; თანამდებობა დატოვოს სამტრედიის რაიონული პოლიციის უფროსმა; შსს-ს მინისტრმა საზოგადოებრივი ორგანიზაციების თანამონაწილეობით შექმნას მონიტორინგის ჯგუფი, რომელიც თბილისსა და რეგიონებში პოლიციის მხრიდან ძალის გადამეტებისა და შანტაჟის პრაქტიკებს შეისწავლის; დაუყოვნებლივ გადაიდგას ქმედითი ნაბიჯები რეპრესიული ნარკოპოლიტიკის შესაცვლელად.
„სტურუას თვითმკვლელობის ფაქტმა კიდევ ერთხელ დაგვანახა, რომ პოლიციისათვის მინიჭებული ძალაუფლება აჭარბებს გონივრულ და ლეგალურ ფარგლებს. ის, რაც ნარკოპლიტიკით ინიღბება, სინამდვილეში, მოქალაქეებზე, განსაკუთრებით კი სოციალურად დაუცველ ფენებზე, პოლიციური კონტროლის, ძალადობისა და შანტაჟის მექანიზმს წარმოადგენს. ეს მექანიზმები განსაკუთრებული სიმკაცრით საჯარო სივრცის მიღმა მყოფ ადამიანებს უსწორდება, მისი მოქმედების ძირითად სივრცეებს კი რეგიონები, სოფლები და გარეუბნები წარმოადგენენ. დემურ სტურუას თვითმკვლელობის აქტი საპროტესტო გზავნილია, რომელიც თითოეულ მოქალაქეს მოგვემართება. სახელმწიფოს მიერ მასზე განხორციელებული პოლიციური ძალადობა საკადრის პასუხს საჭიროებს“ – აღნიშნულია „თეთრი ხმაურის მოძრაობის“ პრესრელიზში.
ამავე თემაზე: 38 ორგანიზაცია: ქართულ “მკვლელ” ნარკოპოლიტიკას არ აქვს ანალოგი ცივილიზებულ სამყაროში
