„ხომ შეიძლება პირველადი სამედიცინო დახმარების პუნქტი იყოს?“ – ერთსა და იმავეს ითხოვენ მოქალაქეები ფეისბუქში კურორტ გომისმთაზე დატრიალებული ტრაგედიის შემდეგ.
გუშინ, 29 ივლისს, კურორტ გომისმთაზე 10 წლის ბავშვი შეუძლოდ გახდა, ის ოზურგეთში ჩაიყვანეს და კლინიკაში გარდაიცვალა. ოჯახის ახლობლების თქმით, ბავშვს ანევრიზმა ჰქონდა.
გომის მთაზე დამსვენებლები და მოიალაღეები ყოველ ზაფხულს ადიან, აქ წლებია ითხოვენ პირველადი სამედიცინო პუნქტის მოწყობას, თუმცა უშედეგოდ.
„ნელ-ნელა გაკეთდება ყველაფერი, მიმდინარეობს განვითარება, გზა გაკეთდა წელს,“ – გვითხრა ოზურგეთის მერიის წარმომადგენელმა გომის მთაზე, შოთა ცინცაძემ. მან ვერ თქვა, კონკრეტულად როდისთვის განიხილავს ოზურგეთის მერია კურორტზე სამედიცინო პუნქტის მოწყობას.
გომის მთა
რაც შეეხება აჭარა-გურიის სხვა, საზაფხულო, მთის კურორტებს, კურორტ ბახმაროს ხელმძღვანელმა, მალხაზ გიორგაძემ „ბათუმელებს“ უთხრა, რომ სამედიცინო პუნქტი ბახმაროში პირველ აგვისტოს ამოქმედდება:
„ხელშეკრულების გაფორმებას ველოდებით, შევარჩიეთ სახლი, სადაც ამბულატორია იმუშავებს თვე-ნახევარი, შესაბამისი ინვენტარი უკვე შეძენილია,“ – გვითხრა მალხაზ გიორგაძემ.
კურორტ ბეშუმის ხელმძღვანელის, ემზარ ბოლქვაძის თქმით კი, ბეშუმში სამედიცინო დახმარების პუნქტი წლებია არსებობს.
