ბათუმში, ზღვასთან ახლოს, ელიავას ქუჩის #49 ა- ში დაუსრულებელ კორპუსში ბინების მფლობელები მშენებელ კომპანიას, შპს „ეიჩ გრუპ ბათუმს“ უჩივიან და აცხადებენ, რომ კომპანია აღებულ ვალდებულებას არ ასრულებს, შედეგად კი ახალაშენებული კორპუსი, შესაძლოა, მალე ავარიული სახლების ნუსხაში მოხვდეს.
მესაკუთრეების ინფორმაციით, რომლებმაც ბინები მშენებარე კორპუსში შეიძინეს, კომპანიამ მშენებლობა არ დაასრულა. მათივე ინფორმაციით, დიდი ხანია, რაც კარკასის მიწისქვეშა სართულზე, სადაც საპარკინგე სივრცე უნდა ყოფილიყო წლებია დაჭაობებული წყალი დგას.
ადგილზე მისულ „ბათუმელებს“ გაცილებით რთული ვითარება დახვდა. მშენებარე კოპუსის საპარკინგე სივრცეში დაჭაობებულ წყალში სხვადასხვა სახის ნარჩენი დაცურავს, დიდი ალბათობით აქ ჩადის ფეკალური მასებიც. ახლოს მისვლას შეძლებთ, თუმცა 1 წუთსაც ვერ გაძლებთ, საშინელი სუნია, პირდაპირ შეიძლება ითქვას, რომ იქაურობა ყარს.
მშენებარე კორპუსი ელიავას ქუჩაზე
საპარკინგე ადგილი
ელიავას #49 ა-ში მდებარე მშენებარე კორპუსში 1 კვ.მეტრს 450 დოლარიდან 800 დოლარამდე ფასად ყიდდნენ მშენებლობის დაწყებიდან, 2018 წლიდან, ამ დროსთვის კი ბინების უმეტესობა აქ უკვე გაყიდულია.
ბათუმში, ზღვასთან ახლოს, ელიავას ქუჩაზე მშენებარე კორპუსებში 1კვ.მეტრის ფასი ახლა უკვე 1000 დოლარიდან იწყება და სართულის სიმაღლის მიხედვით იზრდება, ბინა ზღვის ხედით გაცილებით ძვირია, ვიდრე იგივე კორპუში ბინა დაბალ სართულზე, რომელსაც ზღვის ხედი არ აქვს.
„როცა მე შევიძინე ბინა, კორპუსის კარკასი უკვე დასრულებული იყო, მაგრამ არ იყო შეყვანილი კომუნიკაციები, შიდა სამუშაოებიც არ იყო ბოლომდე დასრულებული. მოაჯირი ახლაც საგანგებოდ მაქვს დამაგრებული ბაწრით, რომ ქარმა არ გადააგდოს. ცოტა ხნის წინ მეხუთე სართულის აივანი ჩამოანგრია, შუშები ჩამოყრილია. როცა ვიყიდე, მითხრეს, რომ ეს ყველაფერი 6 თვეში დასრულდებოდა, შემდეგ ვადა გაახანგრძლივეს ვადა, ამის შემდეგ კი პანდემია დაიწყო.
ამ დროს ჩვენ კომპანიასთან პრეტენზიები არ გვქონია, მოგეხსენებათ, პანდემიის გამო ყველაფერი იყო გაჩერებული და ეს გავითვალისწინეთ. ამის შემდეგ დაიწყო დაპირებები: „წლის ბოლოს“, „2 თვეში“, „თვის ბოლოს“ და ეს არ სრულდება უკვე წლებია. ახლაც რომ მივიდე, დირექტორი მეტყვის, თვის ბოლოს დასრულდებაო“ – ამბობს ზაზა მგალობლიშვილი, ერთ-ერთი ბინის მესაკუთრე.
ჩამონგრეული აივანი
მესაკუთრეები შიშობენ, რომ სახლის დაუსრულებელ მდგომარეობაში კიდევ ცოტა ხნით დატოვებამ შესაძლოა მას მდგრადობის პრობლემაც შეუქმნას:
„პარკირების ადგილი წყლით არის ამოვსებული. დაჭაობებულია ადგილი, ბაყაყები დაცურავენ. ეს სახლსაც აფუჭებს. ისეთ სიტუაციაში ჩააგდეს კორპუსი, შესაძლოა მალე ავარიული გახდეს. ამდენი წელია წყალი დგას, წარმოიდგინეთ, რა ხდება იქ. ზოგ მეზობელს რემონტი დასრულებული აქვს. 3 ოჯახი ცხოვრობს, ხელით ააქვთ წყალი მეთოთხმეტე სართულზე. გაზი უკვე ოცნების თემაა, მაგაზე არც კი ვსაუბრობთ“.
კორპუსის უკანა ეზო – აქ გვერდით საცხოვრებელი სახლია.
სამშენებლო დოკუმენტების მიხედვით, ბათუმში, ზღვასთან ახლოს ელიავას #49 ა-ში „ეიჩ გრუპმა“ მშენებლობის ნებართვა 2018 წელს მიიღო. კომპანიას მშენებლობა 2020 წელს უნდა დაესრულებინა, თუმცა დღემდე არ დაუსრულებია. საჯარო რეესტრის მონაცემებით, აქ ბინების უმეტესობა გაყიდულია. შემსყიდველებს შორის ბევრია უცხოეთის მოქალაქე.
მარცხნივ – პროექტის რენდერი, მარჯვნივ მონიშნულია მშენებლობის ადგილი
ამ პროექტზე კ2 კოეფიციენტის გაზრდასთან დაკავშირებულ დოკუმენტში ვკითხულობთ, რომ კომპანიას თანამედროვე საცხოვრებელი კომპლექსი უნდა აეშენებინა:
ამონარიდი კ2- ის გაზრდაზე შუამდგომლობის წერილიდან
„ეიჩ გრუპის“ მიერ უსაფრთხოების წესების დარღვევის შესახებ ინფორმაცია ბათუმის მუნიციპალურ ინსპექციაშიც დაგვიდასტურეს. ინსპექციის ინფორმაციით, კომპანია ელიავას #49 ა-ში უსაფრთხოების წესების დარღვევის გამო დაჯარიმებულია კანონის შესაბამისად – 30 000 ლარით, შემდეგ კი ჯარიმაზე დაერიცხა იგივე ოდენობის საურავი. დაჯარიმების ოქმი კომპანიას სასამართლოში გაუსაჩივრებია.
ჯარიმის თანხა და მასზე დამატებული საურავიც, ჯამში კომპანიისთვის, რომელმაც 1კვ.მეტრი მაღალ სართულზე 800 დოლარამდე ფასად გაყიდა, დაახლოებით 27 კვ.მეტრის ფასია, თუმცა ამასაც ასაჩივრებს.
„ბევრი საკითხი იყო მაგრამ, ყველაფერი სექტემბრის ბოლოს დასრულდება და ჩაბარდება კორპუსი. დიახ, ვპირდებოდი, მაგრამ ვერ შევასრულე, შეფერხებები გვქონდა. ახლა სიტუაცია გამოგვისწორდა და დასრულდება ყველაფერი“ – გვითხრა კომპანიის დირექტორმა გიორგი შერვაშიძემ, თუმცა ჩვენი ინფორმაციით, კომპანიას აქ სამუშაოების გასაგრძელებლად მშენებლობის ნებართვის ვადის გაგრძელება დასჭირდება. კომპანიის დირექტორმა ამასთან დაკავშირებით მერიიდან გაფრთხილება 2024 წლის მაისში მიიღო, მას შემდეგ რაც მერიას არქიტექტორულ პროექტში ცვლილების შესათანხმებლად მიმართა. მერიამ მას მოთხოვნაზე უარი უთხრა, იმის გამო, რომ კომპანიის მშენებლობის ნებართვას ვადა გასული აქვს.
„ბათუმის მუნიციპალიტეტის მერია თვლის, რომ განმცხადებლის მოთხოვნა არ უნდა დაკმაყოფილდეს ვინაიდან, ცვლილები არქიტექტურულ ვიზუალური თვალსაზრისიდან გამომდინარე მიუღებელია, ასევე შეტანის მომენტისათვის გასულია მშენებლობის ნებართვის მოქმედების ვადა. სამშენებლო რეგულაციების თანახმად, თუ გავიდა მშენებლობის ნებართვის მოქმედების ვადა და მშენებლობა არ არის დამთავრებული და დარღვეულია სამშენებლო დოკუმენტაციის მოთხოვნები, მშენებლობის ნებართვის მფლობელმა მშენებლობის ნებართვის გამცემ ადმინისტრაციულ ორგანოს მშენებლობის ახალი ნებართვის გაცემის შესახებ განცხადებით უნდა მიმართოს“ – წერს ბათუმის მერი ბრძანებაში უარის შესახებ.
კომპანიის დირექტორმა დაზუსტებით არ უპასუხა ჩვენს კითხვას, მიმართა თუ არა ამის შემდეგ კომპანიამ ბათუმის მერიას ნებართვის ვადების განახლებაზე და მიიღო თუ არა დადებითი პასუხი: „ყველაფერი გვარდება და სექტემბრის ბოლოს ჩაბარდება“ – გვითხრა გიორგი შერვაშიძემ.
გაცემულია თუ არა ახალი ნებართვა, ამაზე არც მერიაში გვიპასუხეს.
შპს „ეიჩ გრუპ ბათუმი“ 2017 წელს დაფუძნებული კომპანიაა კომპანიის 47 პროცენტს, კომპანიის დირექტორი გიორგი შერვაშიძე ფლობს, 23 პროცენტი ნინო აბაშიძეს ეკუთვნის, დარჩენილი 30 პროცენტი კი ნათია ბაკურიძის საკუთრებაა. რეესტრის მონაცემებით „ეიჩ გრუპი ბათუმის“ წილები დაყადაღებულია შემოსავლების სამსახურის შეტყობინების საფუძველზე.
ელიავას #49ა-ში გვითხრეს, რომ იგივე კომპანიის აშენებულია გვერდით მდებარე კორპუსიც და ისიც ამავე მდგომარეობაშია. საჯარო რეესტრის მონაცემებით, ელიავას #53 – ში მდებარე კორპუსი შპს „ციტრონ ჯგუფს“ აუშენებია. კომპანია ნუგზარ ბაკურიძის საკუთრებაა და კომპანიის დირექტორი ამ შემთხვევაშიც გიორგი შერვაშიძეა. შპს „ციტრონ ჯგუფს“ კიდევ ერთი კორპუსი აუშენებია 36 ა – შიც. როგორც ადგილზე გვითხრეს, სახარბიელო მდგომარეობა არც ამ კორპუსშია.
