ბათუმში ჰაერში მტვრის შემცველობის მაჩვენებელი 2024 წლის 7 ივნისის მონაცემებით გაუარესებულია.
ატმოსფერულ ჰაერში მტვრის მყარი ნაწილაკების [PM10, PM2.5] შემცველობა დამაკმაყოფილებელია, თუმცა ეს არ არის კარგი ზოგი დაავადების მქონე ადამიანების ჯანმრთელობისთვის.
გარემოს ეროვნული სააგენტოს შესაბამის პორტალზე განთავსებული ინფორმაციის თანახმად, როცა მტვრის ნაწილაკების შემცველობა დამაკმაყოფილია, „ჰაერის დაბინძურებისადმი სენსიტიური ჯგუფები შესაძლებელია განიცდიდნენ ზემოქმედებას ჯანმრთელობაზე. თუმცა, მთელი მოსახლეობისათვის მავნე ზეგავლენა მოსალოდნელი არ არის“.
გარემოს სააგენტო ასევე ავრცელებს დაავადებათა კონტროლისა და საზოგადოებრივი ჯანდაცვის ეროვნული ცენტრის რეკომენდაციებს, იმ შემთხვევისთვის, როცა ჰაერში მტვრის ნაწილაკების შემცველობა მომატებულია, თუმცა მთლიანობაში ჰაერის ხარისხი არის „დამაკმაყოფილებელი“ [რაც დაფიქსირებული დღეს ბათუმში]:
„ასეთ დროს გახანგრძლივებული ან დატვირთული გარე ფიზიკური აქტივობა უნდა შეამცირონ შემდეგმა ჯგუფებმა:
- გულის ან ფილტვის დაავადებების მქონე პირებმა
- ბავშვებმა და ხანდაზმულებმა“.
გარემოს ეროვნული სააგენტოს ინფორმაციით ქვეყანაში ჰაერის დაბინძურება „უდაბნოს მტვრის მასების გავრცელებით არის განპირობებული“.
„6 ივნისიდან დედაქალაქში და საქართველოს ზოგიერთ რაიონში ატმოსფერულ ჰაერში ფიქსირდება მყარი ნაწილაკების (PM10, PM2.5) შემცველობის მატება, რაც ძირითადად ტრანსსასაზღვრო დაბინძურებას უკავშირდება და სამხრეთიდან და სამხრეთ-აღმოსავლეთიდან უდაბნოს მტვრის მასების მცირედ გავრცელებით არის განპირობებული“ – აცხადებს სააგენტო.
მტვრის ნაწილაკების გავლენა ჯანმრთელობაზე: თვალის გაღიზიანება, ასთმა, ბრონქიტი, ფილტვის დაზიანება, სიმსივნე, მძიმე ლითონებით მოწამვლა, უარყოფითი ზემოქმედება გულსისხლძარღვთა სისტემაზე.
