საქართველოს პარლამენტის წევრმა ოპოზიციიდან, რომან გოცირიძემ დღეს, 28 მაისს, რუსულ კანონზე პრეზიდენტის ვეტოზე დასაძლევად ხმის მიცემამდე უმრავლესობის წევრებს მიმართა.
გოცირიძემ ხაზი გაუსვა, რომ რუსული კანონის მიღების შემდეგ გარდაუვალი იქნება გავლენა ეკონომიკაზე.
„თქვენ დღეს ქვეყნის მიმართულებას ცვლით. დღეს სამართლებრივად გაფორმდება ბიძინა ივანიშვილის მიერ მიტინგზე გაკეთებული განცხადებები, მისი ახალი პროგრამა საქართველოს რუსეთის სივრცეში დაბრუნებასთან დაკავშირებით.
თქვენ ებრძვით მეგობრებს. თქვენ ჩვენი საერთაშორისო პარტნიორები გამოაცხადეთ მტრებად და თქვენ გამოაცხადეთ მეგობრად პირსისხლიანი რუსეთის რეჟიმი.
თქვენ დაკარგეთ ყველა მეგობარი, ბოლო მეგობარიც კი, უნგრელი ჩინოვნიკების სახით, როდესაც უნგრეთის წარმომადგენელს საშინელი ცილი დასწამა პრემიერ-მინისტრად წოდებულმა ადამიანმა.
თქვენ გაფრთხილებთ ყველა. გაფრთხილებთ საერთაშორისო თანამეგობრობა, გაფრთხილებენ ახალგაზრდები ქუჩაში, გაგაფრთხილათ ლონდონის ბირჟამ, რომელმაც გითხრათ, რომ ჩამოგენგრევათ ეკონომიკა, თუ კი დაადგებით ღალატის გზას ამ კანონის გაფორმებით.
25 პროცენტით გაუფასურდა ქართული კომპანიის აქციები მაისიდან დღემდე.
თქვენ გაგაფრთხილათ ლარმა, კანონის მიღების დღესვე დაეცა ლარი და 60 მილიონი დოლარის ინტერვენციების განხორციელება მოუწია ეროვნულ ბანკს.
დღესაც გაგაფრთხილებთ ლარი. როგორც კი ამ ღილაკს დააჭერთ ხელს ეს 85 ადამიანი, რომელთაც ელემენტარული ნებელობა არა აქვთ შეეწინააღმდეგონ იმ ერთ ახირებულ და არაადეკვატურ ადამიანს, დარწმუნებული ვარ 100 პროცენტით, რომ ლარის გასაჩერებლად კიდევ ათეულობით მილიონი ლარის დახარჯვა მოუწევს ეროვნულ ბანკს.
თქვენ გაგაფრთხილეს ევროპის 6 ქვეყნის პარლამენტის თავმჯდომარეებმა, ვინ არ გაგაფრთხილათ! ბიძინა ივანიშვილის ზოოპარკში არსებული ცხოველების გარდა ყველანი გაფრთხილებდათ, ალბათ ის ცხოველებიც იტანჯებიან ახლა სირცხვილისაგან.
ათი კაცია საჭირო. 10 ხმა თუ დააკლდება, დღეს ეს ადამიანები გადაირჩენენ საკუთარ რეპუტაციას, შეუძლიათ პატიოსანი სინდისით შევიდნენ ოჯახებში. როცა ხელს დააჭერთ, საკუთარ გულისთქმას დაუგდეთ ყური“ – ასე მიმართა უმრავლესობის წევრებს რომან გოცირიძემ.
