„თუ ვინმეს არ უწერია ნათელი მომავალი ისტორიის ფურცლებზე, სწორედ ამ დარბაზში მსხდომი ის ადამიანები ხართ, ვისაც გამოცხადებული ქვეყნის ღალატის ქრონიკა გაქვთ დაანონსებული თქვენი უკვე სამი კენჭისყრით“ – ასე მიმართა დღეს, 28 მაისს, დეპუტატმა ეკა ხერხეულიძემ საქართველოს პარლამენტის უმრავლესობას.
დღეს პარლამენტი განიხილავს რუსულ კანონზე პრეზიდენტის ვეტოს დაძლევის საკითხს, სხდომაზე გამომსვლელთა განცხადებებიც სწორედ რუსულ კანონს შეეხება, რომელსაც საქართველოში უკვე ორი თვეა აპროტესტებენ მასშტაბური აქციებით.
„თქვენ გგონიათ, რომ ეს ხალხმრავლობა, რომელიც ქუჩაშია, არის წარმავალი. ასე არ არის. საქართველოს ისტორია თქვენი სურვილების მიხედვით არ იწერება.
აქ არის ჩამოყალიბებული ეროვნული მოძრაობა. როდესაც საყოველთაო გაფიცვა ეფუძნება თეატრებში, უმაღლეს სასწავლებლებში პროტესტს, სტუდენტებში, ლექტორ-მასწავლებლებში, მომღერლებში, სპორტსმენებში, ამას აღარ ჰქვია ერთი საკითხის ირგვლივ გაერთიანებული პროტესტი. ეს არის ეროვნული მოძრაობა.
უნდა გესმოდეთ, რომ თქვენი ღარიბი, თქვენი უმწეო და უმწიფარი პოლიტიკით, როცა ამბობთ, რომ სანქციები არაფერს მოუტანს ქვეყანას და გგონიათ, რომ ჩვენ თურმე ფობია გვაწუხებს და გვეშინია, რომ ვეღარ იფრენთ ამერიკაში, ეს არ არის ჩვენი საწუხარი. ჩვენი საწუხარი გახლავთ საქართველოს მომავალი, რომელსაც დააკარგვინეთ პერსპექტივა და ამდენი მეგობარი, რომელიც დამოუკიდებლობის მოპოვებიდან დღემდე შეიძინა ამ ქვეყანამ.
თქვენ წახვედით ირანში და ჰესბოლასთან და ჰამასთან ერთად დადექით სამეგობრო წრეში. ეს არ არის ჩემი ქვეყნის ოცნება და ნატვრა.
ვის მკვდარს ტიროდით ირანში, გამაგებინეთ?! როდესაც გაკოტრებულები, სრულიად ბანკროტები ბრძანდებით პოლიტიკურ ასპარეზზე. საქართველოს ყველა მეგობარი წაართვით, ყველა პერსპექტივა მოუკალით და დატოვეთ მხოლოდ და მხოლოდ ყველაზე დიდი ომის პარტიის, რუსეთის პირისპირ.
ჩვენი მომავალი გარეთ პასუხს მოგთხოვთ, არა იმიტომ, რომ დღეს დასრულდება აქ პროცესი. არც ერთ შემთხვევაში. დღეს თქვენ თქვენივე განაჩენით საკუთარ თავს დაუწერეთ პოლიტიკური ნეკროლოგი. იცოდეთ, რომ 28 მაისი თქვენი პოლიტიკური დაისი იქნება და ამას შეეგუეთ“ – განაცხადა ეკა ხერხეულიძემ.
