„ეს არის დემოკრატია, რომ უდანაშაულო ადამიანს სანქცია დაუწესოს? რა დააშავა ჩემმა შვილმა? გეკითხებით. ვთქვათ, მე დავაშავე. ეგ არის დემოკრატია? მე ეგეთი დემოკრატია არ მომწონს“, – ასე უპასუხა დეპუტატმა ვიქტორ ჯაფარიძემ ჟურნალისტების შეკითხვას მისი და მისი ოჯახის წევრების შესაძლო სანქცირებაზე.
ვიქტორ ჯაფარიძე თავდაპირველად ენმ-ის მმართველობის დროს, 2004-08 წლებში იყო მაჟორიტარი დეპუტატი; მოგვიანებით, 2012 წელს „ქართული ოცნების“ მაჟორიტარი გახდა, 2016-2020 წლებში ჩატარებულ არჩევნებში კი პროპორციული წესით გახდა პარლამენტარი კვლავ „ქართული ოცნებიდან“. ახლა იგი პოლიტიკური ჯგუფის, „ხალხის ძალა“, წევრია. ჯაფარიძე ფლობს ტელეკომპანია „პოსტტივის“ საკონტროლო პაკეტს.
„საერთაშორისო გამჭვირვალობა – საქართველოს“ (TI) ცნობით, მხოლოდ 2018-20 წლებში ჯაფარიძისა და მისი შვილის, ოთარ ჯაფარიძის ნაწილობრივ მფლობელობაში არსებულმა კომპანიებმა 6 254 688 ლარის ღირებულების კონტრაქტები გააფორმეს სახელმწიფო უწყებებთან, მათ შორის, გამარტივებული შესყიდვის წესით.
შეგახსენებთ, რომ აშშ-ის სახელმწიფო მდივნის თანაშემწემ ევროპისა და ევრაზიის საკითხებში, ჯეიმს ო’ბრაიენმა განაცხადა, რომ რუსული კანონის ამ ფორმით მიღების შემთხვევაში, შესაძლოა, სანქციები დაუწესდეთ მასზე პასუხისმგებელ კონკრეტულ ადამიანებსა და მათი ოჯახის წევრებს.
