16 მაისს ბათუმში რუსული კანონის წინააღმდეგ ბათუმელი მოსწავლეების მესამე საპროტესტო აქცია გაიმართება, რომელშიც ქალაქის 15 სკოლის მოსწავლეები მიიღებენ მონაწილეობას.
საპროტესტო აქცია 16:00 საათზე ცენტრალური პარკის კოლონადებიდან დაიწყება.
აქციის ორგანიზატორი ბათუმელი სკოლის მოსწავლეები არიან.
„მომავალი ჩვენია და მას ჩვენვე ვირჩევთ!
ქალაქ ბათუმის მოსწავლეების ევროპული გაერთიანება მოგიწოდებთ: ქალაქ ბათუმის საჯარო თუ კერძო სკოლების თითოეულ მოსწავლესა და ჩვენს ქალაქში არსებული თითოეული სასწავლებლის თვითმმართველობებს, ხვალ, 16 მაისს, 16:00 საათზე, კიდევ ერთხელ შევიკრიბოთ 6 მაისის პარკის კოლონადებთან ბათუმის მოსწავლეების ევროპული გაერთიანების მიერ ორგანიზებულ საპროტესტო მშვიდობიან აქციაზე და ერთიანი ძალისხმევით შევაჩეროთ და გავანადგუროთ ის ილუზია, რომელიც განსაზღვრავს ევროპულ მომავალს და გვიშენებს უტოპიურ „ოცნებებს“! – ნათქვამია ორგანიზატორთა განცხადებაში.
ორგანიზატორთა მიერ გავრცელებული ინფორმაციის თანახმად, პროტესტს უერთდებიან: 1-ელი, მე-2, მე-3, მე-4, მე-6, მე-7, მე-8, მე-10, მე-13, მე-14, მე-16, მე-18, „ქართულ-ამერიკული“, ბათუმის სასულიერო გიმნაზიისა და „ევრო 2000“-ის მოსწავლეთა თვითმმართველობები და მოსწავლეები.
„ზოგი სკოლა არ აღინიშნა სიაში, დირექციისა და მასწავლებლების დაშინებების გამო, თუმცა მთავარ სათქმელს ხვალ ღიად დააფიქსირებენ. მოქმედების დროა! არა რუსულ კანონს!“ – წერენ ორგანიზატორები.
