დღეს, 9 აპრილს, თბილისში რუსული კანონის წინააღმდეგ აქცია მიმდინარეობს. აქცია 18:00 საათზე დაიწყო. მონაწილეები მსვლელობით მივიდნენ პარლამენტის შენობასთან.
აქციას შეუერთდა პოეტი რატი ამაღლობელი.
„საქართველოს დამოუკიდებლობა დგას ჩვენი თანამოქალაქეების მსხვერპლზე. ჩვენ ისეთ სიტუაციაში ვართ, რომ ისტორიის ყველაზე ჭეშმარიტი ამბების გამეორება გვიწევს.
საქართველო 200 წელია იბრძვის დამპყრობელი რუსეთისგან გასათავისუფლებლად. დღეს ჩვენ მათი ღირსება, მათი ბრძოლა უნდა დავიცვათ.
დღეს, 9 აპრილს ისევ, ჩვენ ვართ ამ გამოწვევის წინაშე, რომ დავიცვათ საქართველოს დამოუკიდებლობა, დავიცვათ ამ დამოუკიდებლობისთვის დაღვრილთა ღირსება. ეს არის თავისუფალი საქართველო, ეს არის საქართველო ევროპაში. საქართველო თავისუფალ სამყაროში.
ეს არის ალბათ ციკლური ბრძოლა საქართველოს სახელმწიფოსადმი, ქართული კულტურისადმი, მისი თავისუფლებისადმი. ეს ბრძოლა სულ არის და ამ ბრძოლაში, როგორც ჩანს, ყველა თაობამ უნდა მიიღოს მონაწილეობა.
1998 წელს იმ თაობამ თავისი შრომა, ოფლი და სისხლი ჩადო. როგორც ჩანს, ახლა ჩვენი ჯერია, ჩვენ უნდა დავიცვათ ეს ამბავი. შარშან გვქონდა მნიშვნელოვანი ბრძოლა, რომელიც ქართველი ახალგაზრდების გამარჯვებით დასრულდა.
მაგრამ ამ ხელისუფლებას არ აქვს არანაირი მორალი. არანაირი სიტყვა, არანაირი სინდისი. ჩვენ ისევ ჯიუტად გამოვალთ აქ, სანამ არ მივაღწევთ მიზანს“, – თქვა რატი ამაღლობელმა „მთავარი არხის“ პირდაპირ ეთერში.
______________
ფოტოზე: რატი ამაღლობელი/კადრი ვიდეოდან
