ხვალ, 26 მარტს, ბათუმის საკრებულოს სხდომაა ჩანიშნული. დღის წესრიგის მიხედვით, სხდომაზე 23 საკითხი უნდა განიხილონ, მათ შორის 18 სამშენებლო პროექტია. საკითხები დღის წესრიგში დღეს დაამატეს, მაშინ, როცა კანონი საკითხების გასაჯაროებას 7 დღით ადრე ითვალისწინებს. ბოლო დროს დამკვიდრებული პრაქტიკით, საკრებულო მშენებლობასთან დაკავშირებულ საკითხებს მალავს – მხოლოდ სხდომის წინა დღეს აქვეყნებს.
ამ მნიშვნელოვან დოკუმენტებს საკრებულოს ოპოზიციონერ წევრებსაც კი არ აწვდიან დროულად. არადა მათ შესწავლას დიდი დრო ნამდვილად სჭირდება. ამის გამო საკრებულოს ოპოზიციონერი წევრები ხშირად საყვედურობენ პირადად საკრებულოს თავმჯდომარეს, რამაზ ჯინჭარაძეს. თავად თავმჯდომარე კი ამტკიცებს, რომ მათი შესწავლა ერთ დღეშიც შესაძლებელია: „სურვილი უნდა გქონდეს“.
რატომ მალავს საკრებულო განსაკუთრებით ქალაქმშენებლობასთან დაკავშირებულ საკითხებს, რომლებიც კანონით საჯარო უნდა იყოს? – სავარაუდოდ იმიტომ, რომ მსგავსი საკითხები სხდომამდე მედიაში მოხვედრის შემდეგ ბევრჯერ გახდა ამომრჩევლის აქტივობის და სხდომაზე დაპირისპირების საგანი. ეს დისკომფორტია „ოცნების“ უმრავლესობისთვის.
ამ დრომდე არსებული პრაქტიკით „ოცნების“ უმრავლესობას წარმოდგენილ განაშენიანების კონცეფციებსა და გეგმებზე შენიშვნები ძირითადად არ აქვს და მხარს უჭერს მათ დამტკიცებას, ოპოზიცია კი საუბრობს სიმჭიდროვის, პარკინგის, მზის სხივის გადანაწილების და სპეციალისტების იმ უარყოფითი დასკვნების შესახებ, რომლებიც ამავე დოკუმენტებშია მოცემული.
თუმცა, საკრებულო მათთვის ამ დოკუმენტების მიწოდებას დიდი ალბათობით მხოლოდ იმიტომ არ აჭიანურებს, რომ ისინი დეტალურად არ შეისწავლონ და არ გააკრიტიკონ მათი გადაწყვეტილებები. ალბათ უფრო იმიტომ, რომ ინფორმაცია დასამტკიცებელი პროექტების შესახებ მედიის ხელში არ მოხვდეს.
არადა მათი გასაჯაროება სავალდებულოა კანონით.
„ბათუმელები“ მერიის ვებგვერდზე ამ დოკუმენტების გამოქვეყნების პრაქტიკასაც აკვირდება. ჩვენ ვაარქივებთ მასალებს, მათ შორის სქრინებს, იმის გამოსაკვლევად, რას და როდის აქვეყნებს მერიის ქალაქმშენებლობისა და არქიტექტურის სამსახური, შემდგომში ქალაქმშენებლობის საკითხების საჯაროობის თაობაზე კანონის მოთხოვნის შესრულებასთან დაკავშირებით ანალიზის მოსამზადებლად.
ამჯერადაც, სხდომის მოწვევის თაობაზე გამოქვეყნებულ დღის წესრიგს, დამატებითი საკითხები 25 მარტს, 18:00 საათის შემდეგ დაამატა. არც მეტი არც ნაკლები, დამატებით საკითხებში ქალაქმშენებლობასთან დაკავშირებული 18 საკითხია, მათ შორის არის განაშენიანების კონცეფციები, დეტალური გეგმები [გდგ] და ასე შემდეგ.
წარდგენილი საკითხების ოდენობის მიხედვით თუ ვიმსჯელებთ და დასამტკიცებელი პროექტების მასშტაბსაც გავითვალისწინებთ, შეიძლება ვთქვათ, რომ მერიის ქალაქმშენებლობისა და ურბანული პოლიტიკის სამსახურის ახალმა ხელმძღვანელმა, გიორგი წანაწყენიაშვილმა, წინამორბედის რეკორდი უკვე მოხსნა.
რადგან პროექტების სიღრმისეულ შესწავლას სხდომამდე ვერც ჩვენ შევძლებთ, გთავაზობთ ზოგად მიმოხილვას იმაზე, თუ რაზე იმსჯელებს ხვალ საკრებულო. ცალკეულ პროექტზე კი დეტალურ მასალას სპეციალისტების მოსაზრებებით „ბათუმელები“ მოგვიანებით შემოგთავაზებთ.
შპს „გთმ ბილდინგი“ განაშენიანების დეტალური გეგმის დამტკიცებას ითხოვს, კომპანია ბათუმში, ბაგრატიონის #139-ში მრავალფუნქციური კომპლექსის მშენებლობას გეგმავს.
რენდერი
რენდერი
ბაგრატიონის #131-ში მშენებლობას „ბაგრატიონი რეზიდენსი გეგმავს“. კომპანიამ მერიას განაშენიანების დეტალური გეგმა წარუდგინა.
რენდერი
დასამტკიცებლად წარდგენილია ასევე შპს „სითი ქონსთრაქშენის“ განაშენიანების დეტალური გეგმა. კომპანია მრავალფუნქციური კომპლექსის მშენებლობას აპირებს მახინჯაურში, ახალგაზრდობის ქუჩის მიმდებარედ, ამაღლების ქუჩის პირველ ჩასახვევში.
გაცემული დავალების შესაბამისად, კომპანია განაშენიანების დეტალური გეგმა 43 მიწის ნაკვეთისაგან შემდგარ გეგმარებით ერთეულზე შეიმუშავა, რომლის ფართობიც 45 000 კვ.მეტრია. დაგეგმვის პირველ ეტაპზე შემუშავდა გდგ-ს კონცეფცია. კომპანიამ კოეფიციენტის გაზრდაც მოითხოვა.
გეგმარებითი ერთეული
შპს „ლაქშერი“ მშენებლობას ახალსოფელში გეგმავს. ახალსოფლის ცენტრიდან სამშენებლო ტერიტორიამდე მანძილი 650 მეტრია. კომპლექსის მშენებლობა დაგეგმილია გორაკზე. ახალსოფლის დასახლების ცენტრიდან სამშენებლო ტერიტორიამდე მისვლა შეიძლება ავგიის ქუჩისა და ავგიის პირველი ჩიხის გავლით.
საკვლევი ტერიტორია
ესკიზი
შპს „სეიფ ინვესტი“ ბათუმში აფსაროსის ქუჩაზე, 20 702 კვ. მეტრზე მრავალსართულიანი კომპლექსის მშენებლობას გეგმავს და პროექტის კ2 კოეფიციენტის გაზრდას ითხოვს.
ეს იმ პროექტების არასრული ჩამონათვალია, რომელთა დამტკიცებასაც საკრებულო, ხვალ, 26 მარტს სხდომაზე გეგმავს.
