აჭარაში სტიქიის შემსწავლელი სამთავრობო კომისია სტიქიის შედეგებს ადგილზე შეისწავლის. აჭარის ჯანდაცვის სამინისტროს ლტოლვილთა და განსახლების დეპარტამენტის ხელმძღვანელის, რამაზ ჯინჭარაძის ინფრომაციით, ამ დროისთვის მოსახლეობას შუახევში შეუძლია შემოვლითი გზით ისარგებლოს, რადგან ხიდების აღდგენა, რომლებიც სტიქიის დროს მდინარემ წაიღო, ჯერჯერობით ვერ ხერხდება.
უსაფრთხო ადგილზე გადაყვანილია ექვსი ოჯახი და ამ დროისთვის ელექტროენერგია არ მიეწოდება 180 ოჯახს, მიმდინარეობს აღდგენითი სამუშაოები. მთავრობის ინფრომაციით, ყველა სტიქიით დაზარალებულ მუნიციპალიტეტში მობილიზებულია შესაბამისი სამსახურები.
გუშინ, 8 ივნისს ყველაზე ძლიერი მეწყრული და სტიქიური პროცესები ხულოს, შუახევისა და ქედის მუნიციპალიტეტებში დაფიქსირდა. ადიდებულმა მდინარემ წაიღო ცხემვანას ხიდი ხულოში, ასევე დროებით აღდგენილი ხიდი შუახევის მუნიციპალიტეტის სოფელ უჩამბაში. უჩამბის ხიდის მიღმა მცხოვრები 320 ოჯახი დროებით ალტერნატიული გზით ისარგებლებს. მნიშვნელოვნად დაზიანდა შიდასასოფლო გზები ხულოსა და შუახევის მუნიციპალიტეტში. ხელმეორედ გააქტიურებული მეწყრული შემთხვევებით მიყენებულ ზარალს სპეციალური კომისია დაითვლის.
სტიქიის ზონაში ჩავიდა საქართველოს შინაგან საქმეთა მინისტრი გიორგი მღებრიშვილი.
