მთავარი,სიახლეები

რუსეთს ტყვეობაში ჰყავს უკრაინის 28 ათასი მშვიდობიანი მოქალაქე – ომბუსდმენი

08.12.2023 • 480
რუსეთს ტყვეობაში ჰყავს უკრაინის 28 ათასი მშვიდობიანი მოქალაქე – ომბუსდმენი

რუსეთს ტყვეობაში ჰყავს უკრაინის 28 ათასი მშვიდობიანი მოქალაქე, მათი მდგომარეობის შესახებ არაფერია ცნობილი – განაცხადა უკრაინის რადას ადამიანის უფლებათა კომისარმა დიმიტრი ლუბინეცმა 7 დეკემბერს ადამიანის უფლებათა საერთაშორისო კონფერენციაზე, გერმანიაში – იუწყება „დოიჩე ველე“.

ლუბინეცმა „სამოქალაქო მძევლების“ დაკავებას უკრაინის ოკუპირებულ ტერიტორიებზე მშვიდობიანი მოსახლეობის წინააღმდეგობის ჩახშობის ახალი სისტემა უწოდა.

„დღეს მდგომარეობით, უკრაინის 28 ათასი მოქალაქე რუსეთის ფედერაციის ტყვეობაშია. ჩვენ ვერ ვამოწმებთ მათ მდგომარეობას, ვერ შევდივართ რუსეთის ციხეებში, ვერ ვაწვდით მედიკამენტებს. კიდევ ერთხელ მივმართავთ საერთაშორისო საზოგადოებას: დაგვეხმარეთ ჩვენი მოქალაქეების დაცვაში, დაგვეხმარეთ მათ დაბრუნებაში!” – განაცხადა ლუბინეცმა.

უკრაინის ომბუდსმენის ინფორმაციით, რუსეთის ტყვეობაში მყოფთა შორის 65 წელს გადაცილებული 2000 უკრაინელია. მისივე თქმით, იყო შემთხვევები, როდესაც 80 წელს გადაცილებულ ადამიანებს მხოლოდ პროუკრაინული განცხადებების გამო აპატიმრებდნენ.

„დოიჩე ველე“ წერს, რომ სამხედრო ტყვეებთან დაკავშირებით ლუბინეცმა განაცხადა, რომ მათ არ იციან სამხედრო ტყვეების ზუსტი რაოდენობა.

„რა ბედი ეწევა უკრაინელ სამხედრო ტყვეებს? ჩვენ არც კი ვიცით სად არიან ისინი, არ ვიცით მათი რაოდენობა. არავინ არავის წერს წერილებს. ეს სისტემა არ მუშაობს რუსეთში“ –  თქვა უკრაინის ომბუდსმენმა.

კონფერენციაზე დიმიტრი ლუბინეცმა ასევე განაცხადა, რომ მისი ინფორმაციით, ტყვეობაში მყოფი უკრაინელები წონაში ათეულობით კილოგრამს იკლებენ.

ლუბინეცის ცნობით, იყო ერთი შემთხვევა, როდესაც ტყვეობაში ყოფნის ხუთი თვის განმავლობაში უკრაინელმა სამხედრო ტყვემ წონაში 77 კგ დაიკლო. ომბუდსმენმა აღნიშნა, რომ რუსული ტყვეობიდან დაბრუნების შემდეგ უკრაინელი სამხედროები ძირითადად მძიმე მდგომარეობაში არიან და რეაბილიტაცია სჭირდებათ.

გადაბეჭდვის წესი


ასევე: