უკრაინის გენერალური შტაბი 3 დეკემბრის საბრძოლო მოქმედებებთან დაკავშირებით უახლეს ცნობებს აქვეყნებს. უწყების ცნობით, გასულ 24 საათში რუსეთმა ერთი სარაკეტო და 45 საავიაციო დარტყმა განახორციელა. აგრეთვე, 49-ჯერ გამოყენებული იყო ზალპური ცეცხლის რეაქტიული სისტემა.
რუსეთის დაბომბვის შედეგად სამოქალაქო პირებს შორის არიან დაღუპულები და დაჭრილები. ასევე, დაზიანებულია სამოქალაქო ინფრასტრუქტურა, მათ შორის საცხოვრებელი სახლები.
საავიაციო დარტყმების ძირითადი წერტილი იყო ფრონტთან ახლოს მდებარე პუნქტები ლუგანსკის, დონეცკისა და ხერსონის ოლქები. საარტილერიო დაბომბვის სამიზნე კი – 130 დასახლებულ პუნქტზე მეტი ჩერნიგოვის, სუმის, ხარკოვის, ლუგანსკის, დონეცკის, ზაპორიჟიეს, დნეპროპეტროვსკის, ხერსონისა და მიკოლაევის ოლქებში.
რაც შეეხება ვითარებას ფრონტის სხვადასხვა მიმართულებაზე – უკრაინის გენშტაბის ცნობით, მოგერიებულია რუსეთის იერიშები სევერსკოეს და სლობოჟანსკოეს, კუპიანსკის, ლიმანის, ბახმუტის, ავდიივკას, მარინკას, შახტიორსკოეს და ზაპორიჟიეს მიმართულებებით.
ამასთან ერთად, მელიტოპოლისა და ხერსონის მიმართულებებით უკრაინული ძალები ინარჩუნებენ დაკავებულ პოზიციებს. მნიშვნელოვანი ცვლილებები არ აღინიშნება ვოლინსკოესა და პოლესკოეს მიმართულებებით.
