ომის შესწავლის ინსტიტუტის [ISW] ექსპერტების შეფასებით, რუსეთი ცდილობს, ბრძოლის ველზე დაიბრუნოს ინიციატივა.
14 ნოემბრის ანგარიშის თანახმად, ამ მიზნისთვის, აღმოსავლეთის ფრონტზე რუსეთი რამდენიმე შეტევით ოპერაციას ატარებს, თუმცა არაა ნათელი, რამდენად წარმატებული იქნება ეს მცდელობები, ვინაიდან უკრაინა თავადაც ატარებს ამგვარ ოპერაციებს.
ანგარიშში აღნიშნულია, რომ კიევში, თავის მხრივ, ფრონტზე არსებულ ვითარებას აფასებენ, როგორც რთულს, თუმცა კონტროლირებადს.
უახლოეს პერიოდში რუსეთის მიერ ინიციატივის დაბრუნებას ექსპერტები არ მოელიან. მათი აზრით, რუსულ მხარეს არ აქვს საკმარისი ძალები და ერთ ადგილას შეტევისთვის, მეორე მონაკვეთიდან თავდაცვითი ძალების გაყვანა მოუწევს.
ანგარიშში აგრეთვე აღნიშნულია, რომ უკრაინა ტაქტიკურ დონეზე აღწევს წარმატებებს, ხოლო რუსეთი არაერთი მიმართულებით გადავიდა შეტევაში, როგორც სამხრეთის, ასევე აღმოსავლეთის ფრონტზე და ზოგ მონაკვეთზე წინაც წაიწია.
ანგარიშში აღნიშნულია უკრაინის დასავლელი პარტნიორების დახმარების ახალი პაკეტების შესახებაც. კერძოდ, გერმანიის მთავრობამ 13 ნოემბერს განაცხადა უკრაინის დახმარების ახალი პაკეტის შესახებ, რომელშიც შედის 10 „ლეოპარდის“ ტანკი, 14 ყველგანმავალი, 206 სატრანსპორტო საშუალება და ჭურვები. ასევე, ISW-ის ანგარიშში, Reuters-ის 12 ნოემბერს გავრცელებულ ინფორმაციაზე დაყრდნობით აღნიშნულია, რომ გერმანიის კანცლერის, ოლაფ შოლცის კოალიცია თანახმაა გაზარდოს გერმანიის სამხედრო დახმარება მომავალ წელს 8 მილიარდ ევრომდე.
