ომის კვლევის ამერიკული ინსტიტუტი ISW-ი რუსეთ-უკრაინის ომის 15 ოქტომბრის მიმოხილვაში წერს, რომ ნაკლებ სავარაუდოა რუსეთის ძალებმა უახლოეს მომავალში შეძლონ მნიშვნელოვანი გარღვევა ფრონტზე.
ISW-ის მოჰყავს რუსეთის პრეზიდენტის, ვლადიმერ პუტინის განცხადება ავდიივკასთან მიმდინარე მოვლენების შესახებ. პუტინმა 15 ოქტომბერს რუსული მედიისთვის მიცემულ ინტერვიუში განაცხადა, რომ რუსული ძალები ახორციელებენ „აქტიურ თავდაცვას“ ავდიივკას, კუპიანსკისა და ზაპოროჟიეს მიმართულებით.
პუტინის მიერ ავდიივკას მახლობლად რუსული ძალების შეტევის „აქტიურ თავდაცვად“ დახასიათება, ნაცვლად – „აქტიური საბრძოლო ოპერაციებისა“, შესაძლოა იყოს რუსეთის მნიშვნელოვანი წინსვლის მოლოდინის შემცირების მცდელობა – მიიჩნევენ ანალიტიკოსები.
აქვე ვკითხულობთ, რომ რუსული ოპერაციები, არტილერიის ინტენსიური გამოყენებისა და საჰაერო თავდასხმების ჩათვლით, სავარაუდოდ, მიზნად ისახავს უკრაინული ძალების შესუსტებას ავდიივკას გარშემო.
ISW-ი მიიჩნევს, რომ ნაკლებ სავარაუდოა რუსეთის ძალებმა მიაღწიონ მნიშვნელოვან გარღვევას უახლოეს მომავალში. ანალიტიკოსები მიიჩნევენ, რომ პოტენციური წინსვლა, სავარაუდოდ, მოითხოვს პერსონალისა და ტექნიკის გაზრდილ და ხანგძლივ უზრუნველყოფას.
ანგარიშში ასევე ნათქვამია, რომ რუსულმა ძალებმა განაგრძეს შეტევითი ოპერაციები, რომლებიც მიზნად ისახავდა ავდიივკას ალყაში მოქცევას 15 ოქტომბერს, მაგრამ ჯერ არ მიუღწევიათ მნიშვნელოვანი შედეგებისთვის.
ამავე დროს, უკრაინის გენერალური შტაბი იტყობინება, რომ უკრაინულმა ძალებმა მოიგერიეს რუსეთის 15-ზე მეტი თავდასხმა ავდიივკას მახლობლად, ასევე დასახლების ჩრდილო-დასავლეთით და სამხრეთ-დასავლეთით.
რუსული წყაროების თანახმად, 15 ოქტომბერს, წინა დღეებთან შედარებით, ავდიივკასთან რუსულ ძალებს წინსვლა ჰქონდათ, თუმცა ISW წერს, რომ რუსეთის წინსვლა გეოლოკაციური კადრებით არ დასტურდება.
როგორც უკრაინელმა სამხედრო დამკვირვებლებმა, ასევე რუსულმა წყაროებმა განაცხადეს, რომ რუსულმა ძალებმა ვერ მიაღწიეს სასურველ მყისიერ გარღვევას და აქვთ დიდი დანაკარგები.
ამავე დროს, ISW-ი მიიჩნევს, რომ რუსული ძალები რჩებიან საფრთხედ უკრაინისთვის ამ რაიონში, მიუხედავად იმისა, რომ ნაკლებად სავარაუდოა, უახლოეს მომავალში მიაღწიონ გადამწყვეტ გარღვევას ან ალყაში მოაქციონ ავდიივკა.
„რუსული შეტევითი ოპერაციების ტემპის შემცირება შეიძლება იყოს ტაქტიკურ ვითარებაში დროებითი და რუსეთის ძალებმა შესაძლოა გააძლიერონ ავდიივკას ალყაში მოქცევის მცდელობები უახლოეს დღეებში. უკრაინელმა სამხედრო დამკვირვებელმა აღნიშნა, რომ რუსულმა ძალებმა შეაღწიეს უკრაინის ფლანგებში ავდიივკას ირგვლივ და მნიშვნელოვან საფრთხეს უქმნიან უკრაინის პოზიციებს“ – წერს ISW-ი.
ანგარიშში ასევე აღნიშნულია, რომ უკრაინულმა ძალებმა განაგრძეს შეტევითი ოპერაციები ბახმუტთან და დასავლეთ ზაპოროჟიეს ოლქში 15 ოქტომბერს და ოდნავ დაწინაურდნენ ბახმუტის სამხრეთით.
_________________
ფოტო: უკრაინის გენერალური შტაბი/facebook
