10 ოქტომბრის მონაცემებით, ხარკოვის ოლქის სოფელ გროზაში რუსული სარაკეტო თავდასხმის შედეგად დაღუპულთა რიცხვი 53 ადამიანამდე გაიზარდა, მათ შორისაა რვა წლის ბავშვი.
ამის შესახებ უკრაინის პროკურატურა ავრცელებს განცხადებას.
რუსეთის თავდასხმის შედეგად ექვსი მშვიდობიანი მოქალაქე დაშავდა. დაღუპულთა ცხედრების იდენტიფიცირება ამ დრომდე მიმდინარეობს. ექსპერტებმა უკვე შეძლეს 49 ცხედრის იდენტიფიცირება, ხუთი ადამიანი კი დაკარგულად მიიჩნევა.
5 ოქტომბერს უკრაინაში, ხარკოვის ოლქის სოფელ გროზაში, რუსეთმა დაბომბა სოფლის ცენტრში მდებარე მაღაზია და კაფე, სადაც ქელეხი იმართებოდა და ათობით ადამიანი იყო თავმოყრილი. უკრაინული მედიის ცნობით, ქელეხზე შეკრებილები რუსეთ-უკრაინის ომში დაღუპულ ჯარისკაცს, ანდრეი კოზირს გლოვობდნენ, როცა შენობას ჭურვი მოხვდა.
დაბომბვისას დაიღუპნენ გარდაცვლილი ჯარისკაცის ცოლი და შვილები.
ფოტო: EPA-EFE/YAKIV LIASHENKO
ამავე თემაზე:
რუსეთმა ხარკოვის ცენტრს დაარტყა, ნანგრევებში ბავშვის ცხედარი იპოვეს
