ომის კვლევის ამერიკული ინსტიტუტი [SW] 8 ოქტომბერს გამოქვეყნებულ ანგარიშში რუსეთ-უკრაინის ომის შესახებ წერს, რომ უკრაინა სერიოზულად უნდა მოემზადოს ზამთარში რუსეთის მხრიდან დრონების ინტენსიური თავდასხმისთვის.
ანალიტიკოსებს მოჰყავთ უკრაინის საჰაერო ძალების სპიკერის, პოლკოვნიკ იური იგნატის ციტატა, რომელმაც თქვა, რომ რუსეთმა ბოლო პერიოდში გაზარდა ირანული დრონების, „შაჰედების“ დარტყმების სიხშირე.
კერძოდ, იგნატის თქმით, რუსულმა ძალებმა გამოიყენეს 1000 „შაჰედი“ 2023 წლის გაზაფხულ-ზაფხულში და რეკორდული რაოდენობა – 500 დრონი, მხოლოდ ამავე წლის სექტემბერში.
იგნატმა ასევე აღნიშნა, რომ უკრაინა ეტაპობრივად ანაცვლებს საბჭოთა საჰაერო თავდაცვის სისტემებს დასავლეთიდან მოწოდებული სისტემებით და აპირებს ამ სისტემების გამოყენებას უკრაინის ენერგეტიკული ობიექტების, პორტის ინფრასტრუქტურის, მარცვლეულის სილოსებისა და სხვა კრიტიკული ინფრასტრუქტურის დასაცავად ზამთარში რუსული დრონების თავდასხმებისგან.
ანალიტიკოსები გეოლოკაციურ კადრებზე დაყრდნობით ამბობენ, რომ უკრაინულმა ძალებმა განაგრძეს კონტრშეტევა ბახმუტის მახლობლად და 8 ოქტომბერს დასავლეთ ზაპოროჟიეს ოლქში ოდნავ დაწინაურდნენ.
ამავე დროს, ანგარიშში აღნიშნულია, რომ რუსულმა ძალებმა განაგრძეს შეტევითი ოპერაციები კუპიანსკი-სვატოვო-კრემინას ხაზის გასწვრივ და გავრცელებული ინფორმაციით, წინ წავიდნენ ზოგიერთ რაიონში.
