პარასკევს, 6 ოქტომბერს ცნობილი გახდება ვინ მიიღებს ნობელის პრემიას მშვიდობის დარგში.
ნობელის პრემიის ვებგვერდის თანახმად, 2023 წლის მშვიდობის პრიზზე 351 ნომინანტია: 259 ფიზიკური პირი და 92 ორგანიზაცია. კანდიდატების ვინაობა შეიძლება ცნობილი გახდეს მხოლოდ 50 წლის შემდეგ, თუმცა წარმდგენებს უფლება აქვთ გაამხილონ მათ მიერ შეთავაზებული პირის ან ორგანიზაციის სახელი.
მედიის ინფორმაციით, წელს ნომინანტებს შორის არიან: უკრაინის პრეზიდენტი ვოლოდიმირ ზელენსკი, ნატოს ხელმძღვანელი იენს სტოლტენბერგი და უკრაინული ჯგუფი, რომელიც მუშაობს საერთაშორისო ომის დანაშაულების ტრიბუნალის შექმნაზე, ასევე, რუსი აქტივისტი ალექსეი ნავალნი, ჟურნალისტი და პოლიტიკური აქტივისტი ვლადიმირ კარა-მურზა და რუსული პროდემოკრატიული ახალგაზრდული მოძრაობა „ვესნა“, კლიმატის აქტივისტები: გრეტა თუნბერგი შვედეთიდან და ვანესა ნაკატე უგანდადან, ირანელი ჟურნალისტი და ქალთა უფლებადამცველი მასიჰ ალინეჯადი და მისი მოძრაობა ჰიჯაბის ტარების წინააღმდეგ.
მედიის ცნობით, წელს უკრაინის პრეზიდენტი, ვოლოდიმირ ზელენსკი ტოტალიზატორების ფავორიტია – ათასობით ადამიანი სწორედ ზელენსკის მოგებაზე დებს ფსონს.
ტოტალიზატორების ფავორიტია, ასევე, ნატოს გენერალური მდივანი, იენს სტოლტენბერგი.
მიუხედავად ამისა, ექსპერტები მიიჩნევენ, რომ საეჭვოა ომის პერიოდის ლიდერი გახდეს მშვიდობის პრიზის მფლობელი.
