დღეს, 3 ოქტომბერს, საკონსტიტუციო სასამართლოს პლენუმი განიხილავს სალომე ზურაბიშვილის იმპიჩმენტის შესახებ კონსტიტუციურ წარდგინებას.
სხდომას პრეზიდენტი ზურაბიშვილი არ ესწრება.
„ჩემი სრული ნდობა ჩემს ორ წარმომადგენელს საკონსტიტუციო სასამართლოში – თამარ ჩუგოშვილსა და მაია კოპალეიშვილს,“- დაწერა დღეს პრეზიდენტმა საკუთარ ფეისბუქგვერდზე.
დღეს საკონსტიტუციო სასამართლოში იმსჯელებენ, დაარღვია თუ არა პრეზიდენტმა კონსტიტუცია, როდესაც უცხოეთში გაემგზავრა მთავრობასთან შეუთანხმებლად.
მაია კოპალეიშვილი თავად არის საკონსტიტუციო სასამართლოს ყოფილი წევრი, ხოლო თამარ ჩუგოშვილი საიას ყოფილი თავმდჯომარეა. ის წინა მოწვევის პარლამენტის წევრი იყო „ქართული ოცნების“ სიით, რომელიც შემდგომში დატოვა.
სპეციალისტები პრეზიდენტის იმპიჩმენტის პროცესს კონსტიტუციის თვითნებურ განმარტებად აფასებენ.
საკონსტიტუციო სასამართლოში პარლამენტის ყოფილი წარმომადგენელი თინათინ ერქვანია მიიჩნევს, რომ „საქართველოს მოქმედი პრეზიდენტის წინააღმდეგ წამოწყებული იმპიჩმენტის პროცედურა არალეგიტიმურია, რადგან ეფუძნება კონსტიტუციის თვითნებურ განმარტებას“.
