რუსეთის უშიშროების საბჭოს თავმჯდომარის მოადგილე, დიმიტრი მედვედევი, რომელიც ხშირად გამოირჩევა ბირთვული იარაღის გამოყენების მუქარით, დღეს, პირველ ოქტომბერს, ტელეგრამზე წერს, რომ ნატოს ქვეყნების ლიდერები რუსეთს მესამე მსოფლიო ომისკენ უბიძგებენ უკრაინის დახმარებით.
ამჯერად მედვედევის სამიზნე დიდი ბრიტანეთის თავდაცვის ახალი მინისტრი, გრანტ შაპსი აღმოჩნდა, რომელსაც მედვედევმა „ახალგამომცხვარი კრეტინი“ უწოდა იმ განცხადების საპასუხოდ, რომ ბრიტანელმა ინსტრუქტორებმა, შესაძლოა, უკრაინელი ჯარისკაცების მომზადება უკრაინაშივე დაიწყონ.
„ისინი განადგურებული იქნებიან და უკვე არა როგორც დაქირავებულები, არამედ როგორც ნატოს ბრიტანელი სპეციალისტები“ – წერს მედვედევი.
ამავე დროს, მედვედევი გერმანიის ბუნდესტაგის თავდაცვის კომიტეტის თავმჯდომარის, მარი-აგნეს სტრაკ-ზიმერმანის განცხადების საპასუხოდ, რომ „თუ დასავლეთი კიევს ნაკლებ იარაღს მიაწვდის, ეს შეაფერხებს მშვიდობის მიღწევას“, წერს:
„კიდევ ერთი სულელი – გერმანიის თავდაცვის კომიტეტის ხელმძღვანელი რთულად გამოსათქმელი გვარით – ითხოვს „ტავროსის“ რაკეტების დაუყოვნებლივ მიწოდებას უკრაინისთვის, რათა კიევის რეჟიმმა შეძლოს დარტყმა რუსეთის ტერიტორიაზე ჩვენი ჯარის შესასუსტებლად. ამბობს, რომ ეს საერთაშორისო კანონმდებლობას შეესაბამება. ამ შემთხვევაში, თავდასხმები გერმანულ ქარხნებზე, სადაც ეს რაკეტები მზადდება, სრულად შეესაბამება საერთაშორისო კანონმდებლობას“ – წერს მედვედევი და დასძენს, რომ რუსეთს უბიძგებენ მესამე მსოფლიო ომისკენ.
