ომის შესწავლის ამერიკული ინსტიტუტის – ISW-ის ცნობით, 20-21 აგვისტოს უკრაინულმა ძალებმა დასავლეთ ზაპოროჟიეს ოლქში, რობოტინის აღმოსავლეთით, მიაღწიეს ტაქტიკურად მნიშვნელოვან წარმატებას დონეცკ-ზაპოროჟიეს ოლქის ადმინისტრაციულ საზღვარზე და აღმოსავლეთ უკრაინაში – კონტრშეტევის ოპერაციების გაგრძელებისას.
ამის შესახებ აღნიშნულია ISW-ის 21 აგვისტოს ანგარიშში რუსეთ-უკრაინის ომის შესახებ.
ანალიტიკოსები ღია წყაროებზე დაყრდნობით წერენ, რომ 20 და 21 აგვისტოს გამოქვეყნებული გეოლოკაციური კადრები მიუთითებს იმაზე, რომ უკრაინულმა ძალებმა მიაღწიეს რობოტინოს ცენტრალურ ნაწილს და გაარღვიეს რუსული თავდაცვა მალა ტოკმაჩკას სამხრეთით.
ISW-ი ასევე რუსულ წყაროებზე დაყრდნობით აღნიშნავს, რომ შესაძლოა რუსულმა ძალებმა უკან დაიხიეს ვერბოვეს მახლობლად მდებარე ზოგიერთი პოზიციიდან.
ISW-ის შეფასებით, უკრაინის წინსვლა რობოტინოსთან ტაქტიკურად მნიშვნელოვანია და უკრაინის მუდმივი წინსვლა ამ რაიონში, სავარაუდოდ, მიზნად ისახავს რუსული ძალების დასუსტებას, რომელთაც მნიშვნელოვანი ძალისხმევა, რესურსები და პერსონალი ჩადეს რობოტინოს გარშემო პოზიციების დასაკავებლად.
ანალიტიკოსები ასევე აღნიშნავენ, რომ გავრცელებული ინფორმაციით, უკრაინული ძალები წინ წავიდნენ ბახმუტისა და კრემინას მიმართულებით გასული კვირის განმავლობაში და განაგრძეს კონტრშეტევითი ოპერაციები ველიკა ნოვოსილკას სამხრეთით.
ISW-ის ანგარიშში აღნიშნულია, რომ რუსი ბლოგერები წერენ, რომ რუსეთის შეიარაღებულ ძალებს არ გააჩნიათ აღჭურვილობა და აქვთ დაბალი მოტივაცია ფრონტის მთელ ხაზზე.
ასევე, ანალიტიკოსები წერენ, რომ რუსეთის თავდაცვის სამინისტრო ქმნის ახალ სამხედრო ფორმირებებს, რომლებიც, შესაძლოა, ხერსონის ოლქში გადანაწილდნენ.
