შავ ზღვაში რუსეთის მიერ უკრაინის მიმართ გამოცხადებული საზღვაო ბლოკადა გაარღვია სამმა სამოქალაქო სატვირთო გემმა, მათგან ერთს თურქულ-ქართული რეგისტრაცია აქვს, ერთ – ისრაელის, ერთს კი – საბერძნეთის – ამის შესახებ „ფორბსი“ წერს.
გამოცემის ცნობით, გემებმა ღუზა ჩაუშვეს უკრაინის პორტში, იზმაილში, მარცვლეულის გადასატანად. მდინარე დუნაის დელტაში მდებარე ეს პორტი რუმინეთთანაა ახლოს.
გემი, სახელწოდებით YILMAZ KAPTAN-ი, რომელიც „ფორბსის“ სტატიაში მითითებულია, როგორც თურქულ-ქართული რეგისტრაციის მქონე, რამდენიმე დღის წინ იმყოფებოდა ფოთში. marinetraffic.com-ის ცნობით, გემი ვანუატუს დროშით ცურავს.
გემებს შავ ზღვაში ნატოს ოთხი სამხედრო თვითმფრინავი პატრულირებდა: აშშ-ს საზღვაო ძალების P-8 საპატრულო თვითმფრინავი, აშშ-ს არმიის „ჩელენჯერი“ ზედაპირის სკანირების რადარით, აშშ-ის საჰაერო ძალების RQ-4 და ნატოს სადაზვერვო თვითმფრინავი E-3.
„ფორბსის“ ცნობით, ჩვეულებრივ, არც ერთი ეს თვითმფრინავი არ არის შეიარაღებული, მაგრამ ნატოს საბრძოლო თვითმფრინავები, მათ შორის იტალიური Eurofighter-ები და F-16-ები ახლოს იყვნენ რუმინეთში.
„ფორბსი“ წერს, რომ სატვირთო ხომალდები არ ცდილობდნენ განზრახვის დაფარვას, მათი მდებარეობა და კურსი ხილული იყო ღია წყაროებში.
რუსეთმა 17 ივლისს განაცხადა, რომ წყვეტდა მონაწილეობას ე.წ. მარცვლეულის შეთანხმებაში და ფაქტობრივად დაემუქრა ყველა ქვეყანას, რომელთა გემებიც შავი ზღვის აკვატორიაში უკრაინის პორტებისკენ გაემართებოდნენ. რუსეთმა განაცხადა, რომ კონფლიქტში ჩართულად ჩათვლიდა ყველა იმ ქვეყანას, რომლის დროშის ქვეშ მცურავი გემებიც უკრაინის ტერიტორიულ წყლებში გამოჩნდებოდა.
ამის მიუხედავად, ომის კვლევის ამერიკული ინსტიტუტი ივლისის ბოლოს წერდა, რომ გაზრდილი სამხედრო მზაობის მიუხედავად, ნაკლებ სავარაუდოა, რუსეთის შავი ზღვის ფლოტმა შეძლოს უკრაინის სრული ბლოკადა შავ ზღვაში.
___________
ფოტო: ukrinform.net