აქციაზე დაკავებულ უკრაინელ ქალს ექიმის დახმარება დასჭირდა – ადვოკატი

ბათუმში რუსეთიდან შემოსული გემის წინააღმდეგ გამართულ აქციაზე დაკავებულ ქალს, რომელიც უკრაინის მოქალაქეა, ექიმის დახმარება დასჭირდა. ადვოკატ ნინო ირემაძის თქმით, დაკავებულ ქალს დახურული სივრცის შიში აქვს და რამდენჯერმე შეუძლოდ გახდა:

„რამდენჯერმე გამოიძახეს სასწრაფო დახმარების ჯგუფი.“

ნინო ირემაძემ დაკავებული ქალი უკვე მოინახულა, ის ოზურგეთის წინასწარი დაკავების იზოლატორშია გადაყვანილი.

ადვოკატის თქმით, ქალი ამბობს, რომ პოლიციამ მისი დაკავების დროს არაპროპორციული ძალა გამოიყენა: „დაზიანებებზეც საუბრობდა“.

უკრაინის მოქალაქის, დაკავებული ქალის ინტერესებს „საფარის“ იურისტი ნინო ირემაძე იცავს.

აქციაზე დაკავებულების ინტერესებს იცავს ასევე საქართველოს იურისტთა ასოციაცია [საია] და „გამჭვირვალობა საქართველო“.

საიას ინფორმაციით, აქციაზე უკრაინის კიდევ ერთი მოქალაქე დააკავეს, მის ინტერესებს საია იცავს.

საერთო ჯამში რუსეთიდან გემის შემოსვლის საწინააღმდეგო აქციაზე ბათუმში 23 პირი დააკავეს.  ისინი ბათუმის, ოზურგეთისა და სენაკის წინასწარი დაკავების იზოლატორებში გადაიყვანეს.

საიას ინფორმაციით, ამ დრომდე დაკავებულების საქმე სასამართლოს არ გადასცემია. შესაბამისად, პროცესი ჩანიშნული არ არის, როგორც საია ვარაუდობს, პოლიცია ადმინისტრაციული კოდექსით გათვალისწინებულ მაქსიმალურ ვადას – 72 საათს იყენებს.

დაკავებების კანონიერებას საია გაასაჩივრებს.

საიას აჭარის ორგანიზაციის ხელმძღვანელის თამარ წულუკიძის ინფორმაციით, ფიქსირდება სიტყვიერი შეურაცხყოფაც პოლიციელების მხრიდან.

ამ დრომდე საია ვერ არკვევს 23 დაკავებულიდან 4 პირის ვინაობას და მათ ადგილსამყოფელს.

დაკავებულებს სახელმწიფო [მუხლი 166-ე] წვრილმან ხულიგნობას და [მუხლი 173-ე] პოლიციისადმი დაუმორჩილებლობას ედავება.

___
პალაუს დროშის ქვეშ მცურავი გემი Astoria Grande, რომელსაც თურქული საკრუიზო კომპანია Miray Cruises International-ი ემსახურება, ბათუმის ნავსადგურში ორჯერ – 27 და 29 ივლისს შემოვიდა. ბათუმში ლაინერის შემოსვლას საპროტესტო აქციით დახვდნენ.

ვრცელდება ინფორმაცია, რომ გემი ეკუთვნის რუსულ კომპანია Sovtracht-ს, რომლის მფლობელი დიმიტრი პურიმი უკრაინის მიერ არის სანქცირებული. საქართველოს ეკონომიკის სამინისტროსა და საზღვაო ტრანსპორტის სააგენტოში კი აცხადებენ, რომ ეს ლაინერი სანქცირებული არ არის.