ბათუმის აქციაზე დაკავებული 23 მოქალაქიდან საიას აჭარის ორგანიზაციისთვის ამ დროისთვის მხოლოდ 9 პირის სახელი და გვარია ცნობილი. ორგანიზაციაში დაზუსტებით არ იციან, ვინ სად არის გადაყვანილი.
საიას აჭარის ორგანიზაციის ხელმძღვანელის, თამარ წულუკიძის ინფორმაციით, მათ დაზუსტებით მხოლოდ ის იციან, რომ 6 დაკავებული ბათუმის იზოლატორშია მოთავსებული, სხვები კი სავარაუდოდ ზუგდიდში, ფოთსა და სენაკში გადაიყვანეს: „გვეუბნებიან, რომ შესაძლებელია ისინი გადაყვანილები იყვნენ ფოთში, სენაკში ან ზუგდიდში.“
საიას იურისტები ამ წუთებშიც ცდილობენ დაადგინონ, ვინ სად არის მოთავსებული:
„გვინდა, რომ მოვინახულოთ, უკეთ გავიგოთ, რა მდგომარეობა აქვთ. რაიმე ძალისმიერი მეთოდები ხომ არ ყოფილა გამოყენებული, ზოგადად რა სიტუაციაა მათთან მიმართებით, ამ ფაქტების დადგენა გვსურს. თუმცა ვერ ვიღებთ ამ ინფორმაციას ვერც ერთი უწყებისგან, გვიწევს წრეზე სიარული, ერთმანეთთან გვგზავნიან.“
თამარ წულუკიძე ვარაუდობს, რომ დაკავებულების სასამართლო პროცესებს 48 საათის განმავლობაში არ ჩანიშნავენ.
ბათუმის პორტში საპროტესტო აქციაზე დაკავებულებს შორის არის ბექა გრიგორიადისი, ლაზარე გრიგორიადისის მამა. ასევე „ალტერნატივას“ ხელმძღვანელი, ხათუნა ბერიძე, „დროას“ ხელმძღვანელი აჭარაში – გენრი დოლიძე, დეპუტატ ლევან ანთაძის შვილი – ილია ანთაძე, გიორგი გველესიანი, ირაკლი ხარჩილავა, ირაკლი მეტრეველი, ლუკა წულაძე, მიშა აბზიანიძე, რევაზ მიქელაძე, გიგა შალიკაძე.
გარდა ამისა, საიას თავმჯდომარის თქმით, არსებობს კადრები, სადაც ჩანს, როგორ აკავებენ მოქალაქეს, რომელიც მარტო იდგა და არაფერს აშავებდა: „საინტერესოა, რა საფუძვლით შეადგინეს ოქმი.“
საიას თქმით, დაკავებულების „ახლობლებიც მათ უკავშირდებიან, რომ გაარკვიონ სად არიან გადაყვანილი.“
დაკავებულების ინტერესებს იცავენ: საია, „გამჭვირვალობა საქართველო“ და „საფარი“ .
___
