საქართველოს საავტომობილო დეპარტამენტს ქობულეთის შემოვლითი გზის 4-ზოლიან ჩქაროსნულ მაგისტრალად მოდერნიზების პროექტზე გამოცხადებულ ტენდერში უჩივიან.
ქობულეთის 2-ზოლიანი შემოვლითი გზის 4-ზოლიან მაგისტრალად მოდერნიზებისთვის ტექნიკურ-ეკონომიკური დასაბუთებისა და დეტალური საპროექტო დოკუმენტაციის შედგენაზე, დეპარტამენტის მიერ გამოცხადებულ ტენდერში მომსახურების შესყიდვის სავარაუდო ღირებულება 10,5 მილიონი ლარია.
შპს „კოკს კონსალტი-ს საქართველოს ფილიალი“ დავების საბჭოში გაგზავნილ საჩივარში აღნიშნავს, რომ მან ტენდერში ყველაზე დაბალი ფასი წარმოადგინა – 6 790 000 ლარი. შემსყიდველის ორგანიზაციის სატენდერო კომისიის #4 ოქმის შესაბამისად კი, მას მიენიჭა დისკვალიფიკაცია ტექნიკური დოკუმენტაციის გამო.
გერმანული კომპანია „კოკს კონსალტის“ ფილიალის საჩივარში აღნიშნულია, რომ მის მიერ წარდგენილი და შემდეგ დაზუსტებული დოკუმენტაცია სრულად შეესაბამება სატენდერო მოთხოვნებს, ამიტომ უნდა „გაუქმდეს სატენდერო კომისიის #4 სხდომის ოქმი და დაევალოს შემსყიდველ ორგანიზაციას შეერჩევა-შეფასების პროცესის განხორციელება საქართველოს კანონმდებლობით დადგენილი წესის მიხედვით.“
შესყიდვების სააგენტოს დავების განხილვის საბჭოში შპს „კოკს კონსალტი-ს საქართველოს ფილიალის“ საჩივრის განხილვის თარიღად 2023 წლის 4 ივლისია ჩანიშნული.
შემდეგი პრეტენდენტი, რომელიც საავტომობილო გზების დეპარტამენტს მომსახურებას სთავაზობს, არის სს „ინსტიტუტი იგჰ, სააქციო საზოგადოება სამოქალაქო მშენებლობის კვლევებისა და განვითარების საკითხებში“. ამ კომპანიის შეთავაზება 6 888 500 ლარია.
აღნიშნული სააქციო საზოგადოებაც უცხოური საწარმოს ფილიალია საქართველოში და მისი დამფუძნებელი ხორვატიული კომპანიაა. ფილიალის დირექტორი კი ორმაგი [რუსეთისა და სომხეთის] მოქალაქეობის მქონე რობერტ პეტროსიანია.
ტენდერის პირობის მიხედვით, ქობულეთის შემოვლითი გზის 4-ზოლიან მაგისტრალად გადაკეთების დეტალური პროექტი ტენდერში გამარჯვებულმა/კონსულტანტმა, შესაბამისი ხელშეკრულების გაფორმებიდან, 18 თვეში უნდა მოამზადოს.
ტენდერის დეტალები ნახეთ ამ ბმულზე:
მკვლელი შემოვლითი გზა – რას შეცვლის ხელისუფლება 15 წლის ლიკას დაღუპვის შემდეგ
