„ძაღლს რომ ადამიანი აწამებს, ის ხვალ ჩვენ მოგვკლავს,“ – ამბობს თამარ ბოჭორიშვილი, აქციის „შეაჩერე ცხოველებზე ძალადობა“ ერთ-ერთი მონაწილე. დღეს, 18 ივნისს, საქართველოს რამდენიმე ქალაქში ერთდროულად გაიმართა აქცია მიუსაფარი ცხოველების დასაცავად და მათზე ძალადობის შესაჩერებლად.
თამარ ბოჭორიშვილი აქციაზე ლეკვით ხელში დაგვხვდა. იგი ამბობს, რომ ბათუმში კარგად იცნობენ, როგორც ცხოველების მოყვარულს და ხშირად ურეკავენ ქუჩაში მიტოვებული შინაური ცხოველის შეფარების თხოვნით. ცხოველების უფლებათა დამცველები არაერთ პრობლემაზე საუბრობენ: თავშესაფრების სიმცირე, კანონის „სირბილე“, სამართალდამცველების ნაკლები მგრძნობელობა, საზოგადოების დამოკიდებულება შინაური ცხოველების მიმართ…
„4 დღის წინ დატოვეს ეს ლეკვი ქუჩაში ნაღრძობი ფეხით, დაგდებული იყო ქუჩაში, ბიჭებმა დამირეკეს…“ – გვიყვება თამარ ბოჭორიშვილი. – „სინდისმა შეაწუხა ვიღაცას და არაჟანიც დაუტოვებია თან, რძესთან ერთად…“
„ორჯერ ჩავარდა ტენდერი თავშესაფრის მოწყობაზე,“ – ამბობს თეონა ყურშუბაძე, მიუსაფარი ცხოველების უფლებების დამცველი. თეონა დარწმუნებულია, რომ ახალი თავშესაფარი რომც მოეწყოს, საკმარისი არ იქნება, რადგან ქუჩაში ძალიან ბევრი ცხოველია, ეს კი, რამდენიმე სისტემურ პრობლემას ავლენს.
„უნდა გამკაცრდეს, პირველ რიგში, ცხოველების აყვანის წესი, სავალდებულო უნდა იყოს იდენტიფიცირება, ე.წ. „დაჩიპვა“. ნახეთ, რამდენი ჯიშიანი ძაღლია გამოყრილი ქუჩაში,“ – ამბობს თეონა ყურშუბაძე და მუყაოს ყუთით აქციაზე მოყვანილ 4 ლეკვს დაჰყურებს – ეს ლეკვებიც მიუტოვებიათ.
„ასეა, ვიღაც დაყრის ქუჩაში, მერე ვიღაც იპოვის, გამრავლებას არავინ აკონტროლებს, არავინ აკეთებს სტერილიზაციას და კასტრაციას. ეს უნდა ხდებოდეს მასიურად, მობილური მანქანები უნდა არსებობდეს, რომელიც ამას შეამოწმებს.
ინფრასტრუქტურის მოწყობა, როგორიცაა თავშესაფარი, უკვე ბოლო ეტაპია,“ – მიიჩნევს თეონა ყურშუბაძე.
თეონა ყურშუბაძის აზრით, მთავარი პრობლემა ამ ეტაპზე ცხოველთა მოძალადეების მიმართ სახელმწიფოს რეაქციაა: „კაცმა პნევმატური იარაღით ბავშვების თვალწინ მოკლა ძაღლი და მხოლოდ 3 ათასი ლარით დააჯარიმეს. მაინტერესებს, რატომ არ უნდა არსებობს სასჯელის სახით თავისუფლების აღკვეთა?“ – კითხულობს ცხოველთა უფლებების დამცველი, თეონა ყურშუბაძე.
