ზაფხულის სეზონის დადგომასთან ერთად ბათუმში, კაფეებში ხმაურის გადაჭარბების შემთხვევებმა იმატა. მოქალაქეები განსაკუთრებით, ძველი ბათუმის ტერიტორიაზე ხმაურის გადაჭარბების გამო ჩივიან და კონტროლის გამკაცრებას ითხოვენ. მათივე ინფორმაციით, მუნიციპალური ინსპექციის გამოძახებისა და რეაგირების შემდეგაც არაფერი იცვლება.
„მთელი ღამე ხმაურია, მღერიან, ცეკვავენ – ბოლო ხმაზე მუსიკებია. დასვენების საშუალებას არ გვაძლევენ. რამდენჯერმე მივმართეთ მუნიციპალურ ინსპექციას, მაგრამ უშედეგოდ. დააჯარიმეს და გააგრძელეს ისევ ხმაური“, – გვწერს მოქალაქე „ბათუმელების“ ფეისბუქის გვერდზე.
ინსპექციის ინფორმაციით, ხმაურის ნორმების გადაჭარბების გამო წელს ცხელ ხაზზე 70 შეტყობინება დაფიქსირდა. მათ შორის სპეციალური აპარატით გაზომვის შედეგად 32 შემთხვევაში გამოვლინდა დარღვევა.
ინსპექციის განმარტებით, აკუსტიკური ხმაურის მონიტორინგი სამსახური ტურისტული სეზონის დაწყებასთან დაკავშირებით საგანგებო რეჟიმზე გადავა: „ხმაურმზომი აპარატი შევიძინეთ, რაც მორიგე ჯგუფებს 24 საათიან რეჟიმში მუშაობის საშუალებას მისცემს.“
ხმაურის ნორმების გადაჭარბების შემთხვევაში უნდა დარეკოთ ნომერზე – 598 85 15 20.
თავდაპირველად სამართალდამრღვევს ეძლევა გაფრთხილება. განმეორების შემთხვევაში ფიზიკური პირი 150, იურიდიული პირი კი 500 ლარით ჯარიმდება. განმეორების შემთხვევაში ისევ უნდა დაუკავშირდეთ მუნიციპალურ ინსპექციას.
გასათვალისწინებელია, რომ აკუსტიკური ხმაურის მონიტორინგი არ ვრცელდება დღის საათებში მიმდინარე სამშენებლო სამუშაოებსა და თვითმმართველობასთან შეთანხმებულ ღონისძიებებზე.
