„ეს არის როგორც ორმხრივად ალესილი ხანჯალი, ორი მხარე აქვს ამ საკითხს, რადგანაც შედეგები მოქმედებს ჩვენს წევრ 27-ივე ქვეყანაზე.
ეს არის ისეთი შედეგები, რომლებიც ავნებს ეკონომიკას, ტურიზმს, მაგრამ ჩვენ მაინც გადავწყვიტეთ: არ არის სხვა გამოსავალი, არ არის სხვა არჩევანი და დავაწესეთ სანქციები რუსეთის წინააღმდეგ იმისთვის, რომ ეს საშინელი, სისხლისმღვრელი და წარმოუდგენელი ომი დასრულდეს,“ – უთხრა „ბათუმელებს“ ევროკავშირის ელჩმა საქართველოში პაველ ჰერჩინსკიმ. მას ვკითხეთ, რუსეთთან ფრენების აღდგენის შესახებ: როგორ აისახება ეს კანდიდატის სტატუსზე?
„რა თქმა უნდა, ევროკავშირი გამოხატავს წუხილს ფრენების აღდგენასთან დაკავშირებით. ეს არის იმის საწინააღმდეგო, რაც გადაწყვიტა 27-მა ქვეყანამ.
ჩვენ მივიღეთ მტკიცე გადაწყვეტილება, შეგვეწყვიტა ნებისმიერი ავიახაზებით, ნებისმიერი რეისით, ნებისმიერი სახის თვითმფრინავით ფრენები იმისთვის, რომ იზოლირებული იყოს რუსეთი, იმისთვის, რომ რუსეთს გადაეხადა ფასი ამ სასტიკი ომისთვის, აღმაშფოთებელი საქციელით, რაც მან უკრაინაზე თავდასხმით გამოხატა. გვინდა ცვლილება, რომ შეწყდეს ეს საშინელი ომი, რაც შეიძლება სწრაფად.
როცა საქართველომ ასოცირების შესახებ შეთანხმებას მოაწერა ხელი, მან ამით აიღო ვალდებულება, რომ შესაბამისი და მაქსიმალურად ახლოს იქნებოდა ევროკავშირის საგარეო პოლიტიკასთან. ერთი წლის წინ, როცა საქართველომ შეიტანა განაცხადი ევროკავშირის წევრობაზე, ესეც ამ პოლიტიკასთან შესაბამისობაში უნდა იყოს. მე მთხოვა ევროკავშირის წევრმა 27-მა ქვეყანამ დემარშის გადაცემა ზუსტად ამიტომ, რომ ეს ასახავს 27 წევრი ქვეყნის აზრს ფრენებთან დაკავშირებით.
ჩვენ ველოდებით უახლოესი პარტნიორებისგან, როგორიც არის საქართველო, მუშაობა წარიმართება იგივე მიმართულებით. ჩვენ ვაცნობიერებთ მოწყვლადობას, სხვადასხვა სავაჭრო კავშირს, რომ ეს არის რთული და ჩვენ არ ველოდებით, რომ საქართველო ამ ყველაფრისთვის გადაიხდის მაღალ ფასს, მაგრამ არის მოლოდინი, რომ საქართველო არ იმოძრავებს იმ გადაწყვეტილებების საპირისპიროდ, რომელიც 27 წევრი ქვეყნის მიერ იყო მიღებული,“ – გვითხრა პაველ ჰერჩისკიმ.
„ბათუმელები“ საქართველოში ევროკავშირის ელჩთან – პაველ ჰერჩინსკისთან სრულ ინტერვიუს მალე შემოგთავაზებთ.
