ბახმუტის მიმართულებით უკრაინის არმია ფრონტის გასწვრივ მოძრაობს და წარმატებას აღწევს – ინფორმაციას ამის შესახებ უკრაინული გამოცემა „უკრაინსკაია პრავდა“ ავრცელებს თავდაცვის მინისტრის მოადგილის, ანა მალიარის განცხადებაზე დაყრდნობით.
„ჩვენ ვაგრძელებთ თავდაცვას, რომელიც დავიწყეთ 2022 წლის 24 თებერვალს. თავდაცვითი ოპერაცია შეიცავს ყველაფერს, მათ შორის კონტრშეტევასაც, ამიტომ, ზოგიერთ მიმართულებაზე გადავდივართ შეტევაზე.
მათ შორის საომარი მოქმედებების ეპიცენტრად რჩება ბახმუტის მიმართულება. იქ ჩვენ საკმაოდ ფართო ფრონტზე წინ მივიწევთ. გვაქვს წარმატება, ვიკავებთ დომინანტურ სიმაღლეებს. მტერი თავდაცვაზეა, სურს პოზიციების შენარჩუნება“.
ანა მალიარის თქმით, სწორედ ბახმუტთან დამარცხების გამო რუსები ავრცელებენ ინფორმაციას უკრაინის კონტრშეტევის დაწყების შესახებ.
ბახმუტისთვის ბრძოლა 10 თვეა გრძელდება. რუსეთი აცხადებს, რომ ქალაქი ბახმუტი აღებულია, თუმცა უკრაინული მხარე ამბობს, რომ უკრაინის შეიარაღებული ძალები აგრძელებენ თავდაცვით ოპერაციას ბახმუტის მიმართულებაზე.
