უკრაინას რუსეთში აგენტების ქსელი აქვს და მათ დრონებს აწვდის – CNN

აშშ-ში მიიჩნევენ, რომ უკრაინამ შექმნა აგენტებისა და მხარდამჭერების ქსელი რუსეთში, რომლის წევრებიც ახორციელებენ დივერსიებს, კიევმა კი დაიწყო მათთვის დრონების მიწოდება თავდასხმებისთვის – ამის შესახებ CNN-ი აქვეყნებს ინფორმაციას აშშ-ს დაზვერვის რამდენიმე წარმომადგენელზე დაყრდნობით.

გამოცემის თანახმად, აშშ-ის დაზვერვის ოფიციალური პირები მიიჩნევენ, რომ რუსეთში პროუკრაინელმა აგენტებმა განახორციელეს კრემლზე დრონის თავდასხმა მიმდინარე წლის მაისის დასაწყისში და უპილოტო საფრენი აპარატები რუსეთის ტერიტორიიდან გაუშვეს და არა უკრაინიდან.

აშშ-ში მიიჩნევენ, რომ უკრაინამ შექმნა დივერსიული ჯგუფები რუსეთში, რომლებშიც გაერთიანებული კიევის მხარდამჭერები „კარგად გაწვრთნილნი არიან ამგვარი ომის საწარმოებლად“.

CNN -ის ცნობით, მიიჩნევა, რომ ამ ჯგუფებს უკრაინიდან მიაწოდეს უკრაინული წარმოების დრონები. აშშ-ის ორმა ოფიციალურმა წარმომადგენელმა განუცხადა CNN-ს, რომ არ არსებობს რაიმე მტკიცებულება იმისა, რომ რაიმე სახის დარტყმა განხორციელდა შეერთებული შტატების მიერ მოწოდებული დრონების გამოყენებით.

უცნობია, როგორ მოახერხა უკრაინამ რუსეთში დრონების გაგზავნა, თუმცა ორმა წყარომ განუცხადა CNN-ს, რომ კიევმა ჩამოაყალიბა კონტრაბანდის მარშრუტები.

ასევე, ევროპული დაზვერვის წარმომადგენელმა აღნიშნა, რომ რუსეთ-უკრაინის საზღვარი დიდია და ძალიან კონტროლირებადი, რაც მას კონტრაბანდისთვის ვარგისს ხდის.

„ასევე უნდა გაითვალისწინოთ, რომ ეს არის რუსეთის პერიფერიული ტერიტორია“, – აღნიშნა გამოცემასთან ოფიციალურმა წარმომადგენელმა, „გადარჩენა ყველას პრობლემაა, ამიტომ ნაღდი ფული სასწაულებს ახდენს“.

_____________