„ბოლო ერთი კვირის განმავლობაში რუსეთ-უკრაინის საზღვარზე საჰაერო ბრძოლები გამწვავდა. მხოლოდ 2023 წლის 13 მაისს ბრიანსკის რაიონში ჩამოაგდეს რუსეთის საჰაერო ძალების ოთხი თვითმფრინავი (ორი საბრძოლო თვითმფრინავი და ორი ვერტმფრენი)“ – წერს ბრიტანეთის თავდაცვის სამინისტროს დაზვერვა დღეს, 17 მაისს, ყოველდღიურ ანგარიშში.
ბრიტანული დაზვერვა წერს, რომ 3 მაისს უკრაინამ ჩამოაგდო „კინჟალი“, რუსეთის ჰიპერბგერითი რაკეტა, რომელსაც აქამდე რუსეთი „დაუმარცხებელ“ იარაღად მიიჩნევდა. „რუსეთმა პრიორიტეტად მიიჩნია უკრაინის გაუმჯობესებული საჰაერო თავდაცვის შესაძლებლობების განეიტრალება, მაგრამ ამ პროცესში სავარაუდოდ კიდევ რამდენიმე კინჟალი დაკარგა“ – წერს დაზვერვა.
დაზვერვა მიიჩნევს, რომ მზარდი საფრთხე რუსეთის სასაზღვრო რეგიონში განსაკუთრებული შეშფოთების საგანი იქნება რუსეთის საჰაერო ძალებისთვის, რადგან ისინი იყენებენ ტერიტორიას საჰაერო დარტყმების განსახორციელებლად.
„კინჟალის რაკეტების აშკარა დაუცველობა, სავარაუდოდ, სიურპრიზი და უხერხულობაა რუსეთისთვის: რუსეთის პრეზიდენტმა ვლადიმერ პუტინმა შეაქო ეს სისტემა, როგორც დაუმარცხებელი“, – წერს ბრიტანული დაზვერვა.
რუსეთმა „კინჟალის“ სისტემის რაკეტების გამოყენება უკრაინაში ომის დაწყებიდან მალევე დაიწყო.
______________
ფოტოზე: „კინჟალი“. ფოტო: ვიკიპედია
