განათლება,მთავარი,სიახლეები

ვინ არის განათლების ახალი მინისტრი გიორგი ამილახვარი

20.03.2023 • 2812
ვინ არის განათლების ახალი მინისტრი გიორგი ამილახვარი

დღეს, 20 მარტს, საქართველოს განათლების მინისტრად გიორგი ამილახვარი წარადგინეს.

ამილახვარი საქართველოს პარლამენტში განათლების კომიტეტის თავმჯდომარე იყო, თუმცა რაიმე არსებითი საკანონმდებლო ინიციატივა მის სახელს არ უკავშირდება.

მოსკოვში დაბადებული ამილახვარი, ბოლო პერიოდში ამტკიცებდა, რომ რუსული კანონი, რომლის მიზანიც კრიტიკული მედიის და არასამთავრობო ორგანიზაციების დახურვა იყო, არ იყო რუსული და პირველი მოსმენის დროს მხარიც დაუჭირა.

ამილახვარმა საზოგადოების ყურადღება ასევე მიიქცია ვაკის პარკში 13 წლის მოზარდის დაღუპვის შემდეგ გაკეთებული განცხადებით – ტრაგედიის დღეებში განათლების კომიტეტის თავმჯდომარემ თქვა: „ბავშვს უნდა ჰყავდეს მეთვალყურე, რომ არ ჩავიდეს იმ ადგილას, სადაც რეკონსტრუქცია მიმდინარეობს“.

თუმცა საზოგადოების მხრიდან კრიტიკული გამოხმაურების შემდეგ მან ბოდიში მოიხადა.

ქონებრივი დეკლარაციის მიხედვით, განათლების ახალ მინისტრის შვილები კერძო სკოლაში უნდა დაჰყავდეს, რადგან გასულ წელს, მაგალითად, შვილის განათლებაში 25 000 ლარი და 5 900 დოლარი აქვს გადახდილი.

ამილახვარი, დეკლარაციის მიხედვით, ძვირადღირებული საათების, ტანსაცმლისა და მოგზაურობის მოყვარულია.

2023 წელს შევსებული ქონებრივი დეკლარაციის მიხედვით,  გასულ წელს გიორგი ამილახვარმა და მისმა მეუღლემ, ნინო წერეთელმა, მოგზაურობაში 55 ათასი ლარი დახარჯეს, ტანსაცმელში – 40 ათასი ლარი, ხოლო ძვირადღირებულ საათებში, მხოლოდ 2022 წელს 14 600 ევრო აქვთ გადახდილი.

გიორგი ამილახვრის ქონება და შემოსავლები ვრცლად, შეგიძლიათ იხილოთ ბმულში.

რაც შეეხება ყოფილ მინისტრს, ალექსანდრე ჩხენკელს, მისი თანამდებობიდან გადაყენების მოტივი ოფიციალურად უცნობია.

ჩხენკელი ორჯერ დანიშნეს განათლების მინისტრად. 2019 წელს მან ბიძინა ივანიშვილი ექვთიმე თაყაიშვილს შეადარა. ის ყოველთვის ლოიალური განცხადებებით გამოირჩეოდა მმართველი პარტიის მიმართ.

არაოფიციალური ინფორმაციით, მიხეილ ჩხენკელის თანამდებობიდან გადაყენების მიზეზი, სავარაუდოდ, რუსულ კანონთან დაკავშირებით სამინისტროს კრიტიკული შეფასება იყო.

მთავრობის ინფორმაციით, მიხეილ ჩხენკელი აკადემიურ საქმიანობას უბრუნდება და მუშაობას გააგრძელებს ქუთაისის საერთაშორისო უნივერსიტეტის საერთაშორისო მრჩეველთა საბჭოს თავმჯდომარედ.

გადაბეჭდვის წესი


ასევე: