მთავარი,სიახლეები

კრემლი ირწმუნება, რომ პუტინი მარიუპოლში ჩავიდა

19.03.2023 • 1064
კრემლი ირწმუნება, რომ პუტინი მარიუპოლში ჩავიდა

რუსული მედია ავრცელებს კრემლის პრესსამსახურის ინფორმაციას იმის შესახებ, რომ რუსეთის პრეზიდენტი, ვლადიმერ პუტინი, „სამუშაო ვიზიტით“ უკრაინის ქალაქ მარიუპოლში ჩავიდა, რომელიც ამჟამად რუსეთის არმიის მიერაა ოკუპირებული.

კრემლის პრესსამსახურის ცნობით, პუტინმა „ქალაქის რამდენიმე ობიექტი დაათვალიერა და ადგილობრივ მოსახლეობას გაესაუბრა“.

რუსული სამთავრობო სააგენტო „ტასის“ ცნობით, პუტინი მარიუპოლში ვერტმფრენით გაფრინდა, ავტომანქანით მოიარა ქალაქის რამდენიმე რაიონი და გზადაგზა გაჩერდა.

„მოგზაურობის დროს ვიცე-პრემიერმა მარატ ხუსნულინმა პრეზიდენტს დეტალურად გააცნო ქალაქსა და მის შემოგარენში სამშენებლო და აღდგენითი სამუშაოების მიმდინარეობა. კერძოდ, საუბარი იყო ახალი საცხოვრებელი უბნების, სოციალური და საგანმანათლებლო ობიექტების, საბინაო და კომუნალური მომსახურების ინფრასტრუქტურის, სამედიცინო დაწესებულებების მშენებლობაზე“, – აცხადებს კრემლის პრესსამსახური.

რუსულ მედიაში გავრცელებულ კადრებში ჩანს, რომ პუტინის ვიზიტი ღამით შედგა.

17 მარტს ჰააგის სისხლის სამართლის საერთაშორისო სასამართლომ ვლადიმერ პუტინის დაკავებაზე ორდერი გამოსცა. ეს ნიშნავს, რომ თუ რუსეთის პრეზიდენტი ჩავა იმ ქვეყნებში, რომლებიც ცნობენ ჰააგის სასამართლოს უფლებამოსილებას [ასეთია 123 ქვეყანა], ამ ქვეყნებს ექნებათ მისი დაკავების და სასამართლოსთვის გადაცემის ვალდებულება.

უკრაინის ქალაქი მარიუპოლი რუსეთის არმიამ განსაკუთრებული სისასტიკით დაანგრია. უცნობია მსხვერპლის რაოდენობა ამ ქალაქში, საუბარია ათასობით მოკლულ მშვიდობიან მოქალაქეზე.

გადაბეჭდვის წესი