მთავარი,სიახლეები

„პარლამენტში ამბროსი ხელაიას სურათიანი მაისურის შემოტანისთვის თანამშრომელს ემუქრებიან“

07.03.2023 • 844
„პარლამენტში ამბროსი ხელაიას სურათიანი მაისურის შემოტანისთვის თანამშრომელს ემუქრებიან“

„რასაც დღეს აკეთებთ, არის საქართველოს კონსტიტუციის წინააღმდეგ მოქმედება, ამიტომ გიწევთ უსაფრთხოების ამ ზომების გატარება, იმიტომ, რომ აქ როცა უმრავლესობასა და უმცირესობაზე საუბრობთ, ამ წუთას, როცა ამ სამარცხვინო კანონის განხილვა მიმდინარეობს უმრავლესობის მხარდაჭერით, თქვენ ხართ უმცირესობაში და ამიტომ გიწევთ ძალადობით ამ კანონის გათრევა,“ – განაცხადა პარლამენტის ბიუროს სხდომაზე პარლამენტარმა სალომე სამადაშვილმა, რომელიც პარტია „ლელოს“ წარმოადგენს.

სალომე სამადაშვილი გამოეხმაურა პარლამენტის თავმჯდომარე შალვა პაპუაშვილს, რომელმაც მადლობა გადაუხადა მანდატურებს და სახელმწიფო სპეციალური დაცვის სამსახურს.

2 მარტს პარლამენტის სხდომათა დარბაზში მანდატურის სამსახურის თანამშრომლებმა შესვლის საშუალება არ მისცეს ოპოზიციონერ დეპუტატებს, ისინი ჩაკეტილ კართან იდგნენ და პარლამენტარებს იმ დარბაზში არ უშვებდნენ, სადაც კომიტეტების სხდომაზე რუსულ კანონპროექტს განიხილავდნენ.

როგორ გამოაძევეს ჟურნალისტები პარლამენტიდან

ამ სამსახურებმა იძულებით დაატოვებინეს სხდომათა დარბაზი ჟურნალისტებს და ოპოზიციონერებსაც, რომლებიც სკანდირებდნენ – „არა რუსულ კანონს“.

დღეს, 7 მარტს, პარლამენტის ბიურომ ერთ-ერთ საკითხად განიხილა რუსული კანონის პლენარულ სხდომაზე გატანა. პარლამენტში, იმ სართულზე, სადაც ბიუროს სხდომა მიმდინარეობს, მედიის წარმომადგენლები არ შეუშვეს. ბიურომდე მისასვლელი კიბეები სახელმწიფო დაცვის სამსახურის წარმომადგენლებს ჰქონდათ გადაკეტილი.

სალომე სამადაშვილმა ბიუროს სხდომაზე გაიხსენა შემთხვევაც, როცა მის თანაშემწეს პარლამენტის შენობაში არ შეატანინეს მაისურები, რომლებზეც დამოუკიდებლობისთვის მებრძოლი ადამიანების ფოტოები იყო გამოსახული.

მაისურები, რომელთა შეტანის უფლება პარლამენტში არ მისცეს ოპოზიციას

„მე არ ვიცი, ვინ არის ეს ხალხი, აქ რომ დადიან ფორმის გარეშე დაკუნთული ადამიანები… ჩემი თანამშრომელი გააჩერეს, სისტემაში შეყვანილი ხარო. იგი ცდილობდა, რომ შემოეტანა მაისურები და ეს არის სიტყვის გამოხატვის თავისუფლება, რომ ჩვენ ვაგრძელებთ იმ ადამიანების იდეებს, რომლებიც მუშაობდნენ რუსეთისგან ქვეყნის დამოუკიდებლობისთვის, რომლებმაც სიცოცხლე გასწირეს ეკლესიისთვის, ქართული სახელმწიფოსთვის, ქართული დემოკრატიისთვის.

კადრზე: მანდატური ოპოზიციონერ პარლამენტარებს არ აძლევს სხდომათა დარბაზში შესვლის საშუალებას

ვინ გასცა ბრძანება ჩემს თანაშემწეზე, რომ არ მიეცათ მისთვის შესაძლებლობა, გამოხატვის თავისუფლების ეს უფლება გამოეყენებინა, ვინ გადაუღო სურათი, ვინ უთხრა, რომ არის შეყვანილი სისტემაში?

მაინტერესებს, რა ტიპის სახელმწიფოში ვცხოვრობთ ჩვენ, როცა ამბროსი ხელაიას სურათიანი მაისურის შემოტანისთვის პარლამენტში თანამშრომელს, რომელიც თქვენი თანამშრომელიც არის, ემუქრება გაუგებარი ხალხი,“ – თქვა სალომე სამადაშვილმა.

„გასაგებია თქვენი საკითხი,“ – მხოლოდ ეს თქვა შალვა პაპუაშვილმა დეპუტატის შეკითხვის პასუხად, რამდენიმე წუთში კი, დასძინა: „სახელმწიფო დაცვის სამსახურზე ცუდი სიტყვის თქმის შესაძლებლობას არ მოგცემთ“.

გადაბეჭდვის წესი


ასევე: