„როცა ახლა თქვენ გისვამთ კითხვებს, ჩვენი თანამოქალაქეების დიდი ნაწილი უკვე გაქცეულია საქართველოდან, დარჩენილების უმრავლესობა კი იბრძვის გადარჩენისთვის. ამ ფონზე მინდა დაგისვათ კითხვა თქვენ, ბატონო მომხსენებელო: თქვენ მიერ ინიცირებული პროექტი ოდნავ მაინც ხელს შეუწყობს დარჩენილების უფლებების დაცვას, როცა მათი უფლებები ასე უხეშად ირღვევა?
უნდა ვუთხრა ჩემს თანამოქალაქეებს, რომ ჯერ სად არიან, ყველაზე მთავარი დარღვევები და შელახვა მათი უფლებების წინ არის,“ – აღნიშნა დღეს, 6 მარტს, პარლამენტის იურიდიული კომიტეტის სხდომაზე გამოსვლის დროს დამოუკიდებელმა დეპუტატმა არმაზ ახვლედიანმა.
დღეს, 6 მარტს, რუსულ კანონს პარლამენტის იურიდიული კომიტეტი განიხილავს. სხდომიდან გააძევეს ოპოზიციონერი დეპუტატები, რომლებიც სკანდირებდნენ „არა რუსულ კანონს“. კანონპროექტს გურამ მაჭარაშვილი წარადგენს, რომელიც „ქართული ოცნების“ ყოფილი წევრია, ამჟამად კი, ანტიდასავლური რიტორიკით ცნობილ „ხალხის ძალას“ წარმოადგენს.
„რა მიზანს ემსახურება კანონპროექტი, რა არის მთავარი მიზანი?“ – იკითხა არმაზ ახვლედიანმა, – „ არის თუ არა თანხვედრაში საქართველოს კონსტიტუციის მოთხოვნებთან, საქართველოს მოსახლეობის უმრავლესობის ნებასთან, საქართველოს გაცხადებულ საგარეო პოლიტიკურ სტრატეგიასთან?
ჩვენ ყველა კარგად ვხდებით, რომ ჩვენი ქვეყნის უმთავრესი საგარეო პოლიტიკური პრიორიტეტი არის საქართველოს ინტეგრაცია ევროატლანტიკურ სივრცეში. ეს არის განსაზღვრული ჩანაწერი საქართველოს კონსტიტუციაში. ვიცით მოსახლეობის უმრავლესობის აზრი. 2023 წლის დასაწყისში აღმოვაჩინეთ საქართველოს მოქალაქეებმა, რომ ქართული ოცნების მიერ წამოწყებულია ახალი კამპანია, რაც ახლა გამოხატულია ამ კანონპროექტში, პირდაპირ ისახავს მიზნად საქართველოს ევროატლანტიკური ინტეგრაციის პროცესის შეწყვეტას.
მე მინდა ვკითხო ბატონ მომხსენებელს, თუ შეგიძლიათ განმარტეთ, რამდენად ხელს შეუწყობს საქართველოს ევროატლანტიკურ ინტეგრაციას თქვენ მიერ წარმოდგენილი კანონპროექტი?
ჩვენი უმთავრესი ამოცანა ქართველი ხალხის უმრავლესობის, და მგონია, რომ ამ ნათქვამს ვერავინ დააყენებს ეჭვის ქვეშ, გახლავთ ის, რომ საქართველომ მოახერხოს 2024-ში არჩევნების დემოკრატიულად, სამართლიან გარემოში ჩატარება იმ პირობებში, როცა თქვენ მიერ ახალგანხილული და, როგორც ჩანს, სამწუხაროდ რაღაც დროში უკვე კანონად ქცეული დოკუმენტი საქართველოში აკრძალავს კრიტიკულ აზრს, განსხვავებულ აზრს, დაიწყება ტოტალური დევნა განსხვავებული აზრის, დაპატიმრებები, დახურვა, ჩაწიხვლა…
მე მაქვს ჩემი მოსაზრება და ზუსტად ვიცი, რომ ეს არის მიზანმიმართული ქმედება, რომლის ამოცანა და მიზანი გახლავთ ერთადერთი, რომ 2024 წლისთვის მოსუფთავდეს ველი ისე, რომ აღარავინ იყოს ისეთი, ვინც წინააღმდეგობას გაუწევს…
ზუსტად ვიცი და დარწმუნებული ვარ, რომ საქართველოს კონსტიტუციას თქვენ შეცვლით, ეს იქნება ერთ-ერთი მომდევნო ნაბიჯი თქვენი მმართველობის, როცა კონსტიტუციაში გაჩნდება ახალი ჩანაწერები, რაც სრულად აკრძალავს თავისუფალ სიტყვას, კრიტიკას და გაუქმდება საქართველოში არჩევნები. ეს უახლოესი პერსპექტივაა, თუ შევხედავთ დინამიკას, რასაც თქვენ გვთავაზობთ,“ – აღნიშნა არმაზ ახვლედიანმა.
დღევანდელ სხდომაზე არმაზ ახვლედიანმა კოლეგებს ასევე მოუწოდა, გაბედონ და უარი თქვან რუსული კანონის მიღებაზე. სხდომის თავმჯდომარე ანრი ოხანაშვილმა არმაზ ახვლედიანს მიკროფონი გამოურთო და უთხრა, რომ მან დეპუტატებს კი არ უნდა მიმართოს, არამედ შეკითხვა დასვას.
„თქვენ შეგიძლიათ მიკროფონი გათიშოთ, მაგრამ ჩემს ხმას ვერ გაითიშავთ. თქვენ ეთამაშებით ცეცხლს,“ – თქვა არმაზ ახვლედიანმა.
„დამშვიდდით, ქუჩურად ნუ იქცევით,“ – მიმართა დამოუკიდებელ დეპუტატს სხდომის თავმჯდომარემ.
- რა ხდება?
საქართველოს საპარლამენტო უმრავლესობა გეგმავს კანონპროექტის მიღებას, რომლის ანალოგის დამტკიცების შედეგად რუსეთში არაერთი არასამთავრობო ორგანიზაცია ჯერ „უცხოურ აგენტად“ გამოაცხადეს, წლების შემდეგ კი სრულად აკრძალეს. „უცხოური აგენტების“ შესახებ კანონით ქვეყანაში ებრძვიან მედიასაც.
ამჟამად საპარლამენტო უმრავლესობის წევრებს „ხალხის ძალიდან“ „უცხოური გავლენის აგენტების“ შესახებ ორი კანონპროექტი აქვთ ინიციირებული: 1. როგორც თავად ამბობენ, აშშ-ში მოქმედი „უცხოური აგენტების რეგისტრაციის აქტის“ [FARA] „უფრო შერბილებული“ ვერსია და 2. „ალტერნატივის სახით ამერიკული კანონის ანალოგი“.
საქართველოში მსგავსი კანონის მიღებას აკრიტიკებენ როგორც ქვეყნის შიგნით, ასევე, მისი არმიღებისკენ ხელისუფლებას მოუწოდებენ დასავლელი პარტნიორებიც, მათ შორის, აშშ, ევროკავშირი, გაერო, ევროპის საბჭო.
ევროკავშირის საგარეო სამსახური „უცხოეთის გავლენის აგენტების“ კანონპროექტთან დაკავშირებით აცხადებს, რომ ის ეწინააღმდეგება 12-პუნქტიან რეკომენდაციებს, რომელიც საქართველომ უნდა შეასრულოს კანდიდატის სტატუსის მისაღებად.
პარლამენტი რუსულ კანონს, საზოგადოების მხრიდან მწვავე პროტესტის ფონზე განიხილავს.
რუსულ კანონპროექტს საქართველოში ეწინააღმდეგებიან ავტორიტეტული ორგანიზაციები და ცნობილი მეცნიერები, მწერლები, დიპლომატები, ექიმები, მხატვრები და საზოგადოებისთვის ცნობილი პირები.
