მთავარი,სიახლეები

პარლამენტში რუსული კანონპროექტის განხილვა აქციის ფონზე დაიწყო

06.03.2023 • 1520
პარლამენტში რუსული კანონპროექტის განხილვა აქციის ფონზე დაიწყო

დღეს, 6 მარტს, პარლამენტის იურიდიული კომიტეტი „უცხოური გავლენების შესახებ“ კანონპროექტს განიხილავს.

პარლამენტთან მიმდინარეობს აქცია, სადაც რუსულ კანონს აპროტესტებენ.

გუშინ პარლამენტმა განცხადება გაავრცელა უსაფრთხოების დამატებითი ზომების მიღების შესახებ. კერძოდ, იმოქმედებს პარლამენტის შენობაში დაშვების შეზღუდული რეჟიმი.

სხდომაზე მედიას კვლავ არ შეუშვებენ. კომიტეტთან მისასვლელი დერეფანი სახელმწიფო დაცვის სპეციალურ სამსახურს აქვს გადაკეტილი.

უმრავლესობის დეპუტატები, რომლებიც სხდომაზე დასწრებას აპირებენ მეორე შესასვლელით სარგებლობენ, რომელთან მიახლოების შესაძლებლობას ჟურნალისტებს პარლამენტის დაცვის სამსახური არ აძლევს.

პარლამენტის შენობაში შესულ პირებს დაცვის თანამშრომლებმა დაატოვებინეს მაისურები, რომლებზეც 30-იანი წლების რეპრესიების მსხვერპლები იყვნენ გამოსახული.

რუსულ კანონს აპროტესტებენ ბათუმშიც. საპროტესტოა აქცია დილის 11-ის ნახევარზე ევროპის მოედანზე გაიმართება. „ბათუმელების“ ინფორმაციით, აქცია ბათუმის ევროპის მოედანზე საღამოსაც გაიმართება.

  • რა ხდება?

საქართველოს საპარლამენტო უმრავლესობა გეგმავს კანონპროექტის მიღებას, რომლის ანალოგის დამტკიცების შედეგად რუსეთში არაერთი არასამთავრობო ორგანიზაცია ჯერ „უცხოურ აგენტად“ გამოაცხადეს, წლების შემდეგ კი სრულად აკრძალეს. „უცხოური აგენტების“ შესახებ კანონით ქვეყანაში ებრძვიან მედიასაც.

ამჟამად საპარლამენტო უმრავლესობის წევრებს „ხალხის ძალიდან“ „უცხოური გავლენის აგენტების“ შესახებ ორი კანონპროექტი აქვთ ინიციირებული: 1. როგორც თავად ამბობენ, აშშ-ში მოქმედი „უცხოური აგენტების რეგისტრაციის აქტის“ [FARA] „უფრო შერბილებული“ ვერსია და 2. „ალტერნატივის სახით ამერიკული კანონის ანალოგი“.

საქართველოში მსგავსი კანონის მიღებას აკრიტიკებენ როგორც ქვეყნის შიგნით, ასევე, მისი არმიღებისკენ ხელისუფლებას მოუწოდებენ დასავლელი პარტნიორებიც, მათ შორის, აშშ, ევროკავშირი, გაერო, ევროპის საბჭო.

ევროკავშირის საგარეო სამსახური „უცხოეთის გავლენის აგენტების“ კანონპროექტთან დაკავშირებით აცხადებს, რომ ის ეწინააღმდეგება 12-პუნქტიან რეკომენდაციებს, რომელიც საქართველომ უნდა შეასრულოს კანდიდატის სტატუსის მისაღებად.

_______________

ფოტო: „არა რუსულ კანონს“ – აქცია საქართველოს პარლამენტთან. 6 მარტი, 2023 წელი

გადაბეჭდვის წესი


ასევე: